Претходен број

Валентина Божиновска повторно во црковни води

Изборот на некогашната актерка за директорка на Комисијата предизвика збунетост и кај верските заедници

Билјана Јовановска

Експратеничката Валентина Божиновска со одлука на Владата е именувана за директор на Комисијата за односи со верските заедници. Веста сигурно ќе поминеше незабележано доколку со овој избор не е направен своевиден преседан. Божиновска е првата жена која како државен службеник најдиректно ќе соработува и ќе ги извршува владините одлуки што се однесуваат на верските заедници, поглаварите и верскиот живот во Македонија. Именувањето на некогашната актерка за директорка на Комисијата предизвика збунетост и кај верските заедници, особено кај некои од поглаварите, бидејќи во црковната хиерархија жените немаат такви важни улоги. Оттаму, ќе биде интересно како некогашната пратеничка на ВМРО-ДПМНЕ, која ја напушти својата матична партија, па замина во ВМРО-НП, сега ќе соработува со верските лидери за актуелните жешки теми.

Пред се', со премиерот Никола Груевски, а потоа и со поглаварите Божиновска ќе мора да ги усогласува ставовите околу иднината на веронауката. Познато е дека великодостоинствениците на Македонската православна црква и на Исламската верска заедница не ја криеја огорченоста од одлуката на Уставниот суд за бришење на веронауката од државните училишта, судиите ги нарекуваа богохулници и беа подготвени за многу порадикален настап за враќање на овој спорен предмет. Дознаваме дека тензиите ги кренале толку многу, па дури морал да интервенира премиерот Груевски, кој директно побарал од луѓето во црни мантии да ја спуштат топката и за веронауката да не говорат со усвитени глави, туку онака како што им прилега на духовници. Во тоа и успеал, така што тие ретерираа во првичните иницијативи за промена на Уставот. Сега имаат малку омекнат став и бараат нови законски измени кои ќе овозможат веронауката да биде дел од образовниот систем на основците. Уставните измени не ги спомнуваат.

Се' уште се свежи и настаните и тепачките на скопскиот плоштад, на кои присуствуваа и клирици и верници испратени од МПЦ. Физичката пресметка против студентите од Архитектонскиот факултет кој сметаа дека изборот на локацијата за градба на црква во центарот на градот не е најдобро решение, веројатно имаше партиска заднина, но факт е дека Македонската православна црква многу лесно го „испегла“ своето присуство на овој немил настан кој ја загрижи и меѓународната заедница.

Значи, фотелјата на Божиновска нема да биде којзнае колку пријатна и удобна. За овој факт очигледно многу посвесни биле кадрите од ВМРО-ДПМНЕ, бидејќи никој од нив не сакал да се нафати за функцијата, која подразбира и многу бенефити. Наводно, првата неформална средба Божиновска ја имала со архиепископот Стефан, но затоа не се појавила на неделната миса во Католичката црква.

Но, Валентина Божиновска отпорано има добри релации со г.г. Стефан, кој и е своевиден должник и не е чудно што за „сефте“ отишла токму во неговиот кабинет. Колку за потсетување, токму Божиновска, Љупчо Балковски и Сашко Станинов, како перјаници на некогашното ВМРО-ДПМНЕ на Љупчо Георгиевски го сработија изборот на тогашниот брегалнички владика Стефан за нов архиепископ на МПЦ. Според присуството на спомнатата тројка, но и на енормно голем број членови на ВМРО-ДПМНЕ на Црковно народниот собор, кој се одржа во октомври 1999 година во Охрид, изборот на петтиот поглавар на МПЦ повеќе личеше на партиска конвенција отколку на важен собир на духовници. Како во новата улога ќе се снајде некогашната актерка ќе покаже времето. За почеток, ќе мора да го смени атрактивниот стил на облекување, бидејќи новата функција налага поинакви правила на однесување.