Исчезнаа четворица репрезентативци на С. Кореја

Откако за време на мечот против Бразил, на севернокорејската клупа не се појавија четворица фудбалери, дел од медиумите објавуваат за бегство на севернокорејските репрезентативци. На клупата за резерви ги немаше голманот Ким Мјонг Вон, напаѓачот Ан Чол Хјок и играчите за врска, Ким Кјонг и Пак Сунг Хјок за кои постојат сомнежи дека побегнале од кампот на Северна Кореја по што им се губи секаква трага.

Во таборот на Северна Кореја засега молчат за случајот, ФИФА, пак, порачува дека нема информации за бегство на играчи.

„Водството на Северна Кореја не' извести дека сите играчи се во хотел и никој од нивниот табор не ни пријави ништо“, изјави портпаролот на Светската фудбалска асоцијација, Николас Маингот.

Информациите за исчезнување на четворицата играчи, сепак, беа демантирани неколку часа подоцна.

„Четворицата играчи ги немаше во записникот поради техничка грешка на севернокорејската репрезентација“, изјави Гордон Вотсон од ФИФА.

Според неговите зборови Севернокорејците непотребно ги изоставија фудбалерите на кои не сметаше нивниот селектор за мечот со Бразил. Таквиот потег беше на прагот да донесе скандал, но од тоа очигледно нема ништо бидејќи сите четворица „спорни“ играчи беа на последниот тренинг на репрезентацијата.