Писма - Терористичка група без порака

Златко Ангелески, Скопје


Има грешки во изјавите на Гордана Јакулоска што предизвикаа неоправдан оправдан гнев кај Албанците. Прво, ги фативме убијците... Од каде знае дека токму тие се убијците? Каде е пресумпцијата на невиност? Додека судот не прогласи некого за виновен, неговиот статус е невин! Како може да даде таква изјава! Свесна ли е какви последици може да има таква изјава, во така осетлива меѓуетничка атмосфера? Плус сите правни закони и норми ги прекрши со таа изјава, дури и навистина да се убијците. Што ќе се случи ако судот реши дека не се тие убијците? Или не се сите? Од свој џеб ли ќе им плаќа отштета за нарушен углед на уапсените кои ќе бидат ослободени? И како тоа веднаш пуштија дома голем дел од приведените за кои Јанкуловска веќе кажа дека сигурно се учесници во убиството.

Потоа, станува збор за терористичка група. Постои ли една терористичка група досега во историјата на светот која извршила злосторство, а не дала порака зошто прави злосторот? Знае ли Јанкулоска основи на фунционирање, цели и методи на терористички групи? Знае ли дека првенствени цели на терористичките групи се воени објекти, воени лица, офицери, полиција, државни установи, објекти и лица итн. Каква е таа нова терористичка група која убива деца отидени по риба? Која е нивната порака? Кои се нарачателите? Има ли некој кој стои зад групата? Или кои се тие терористи кои без давање отпор или без испукан куршум беа уапсени? Оваа е некој нов тероризам, пацифистички... Министерката нека гледа повеќе Фокс крајм, ќе научи нешто.

Се работи за радикални исламисти... Какви се тие радикални исламисти? Постојат ли и нерадикални исламисти? Од кој речник го извади овој израз? Сака да каже милитантни исламисти, џихадисти, вахабити... Што? Всушност, која е разликата меѓу радикален и умерен ислам? Постои ли?