Попот од Стaравина должи 10.000 евра за персонален данок

Кај свештеници од Преспанско-пелагониската епархија тропнаа извршители

БИТОЛА - Извршители тропнаа на вратите на неколкумина свештеници од Преспанско-пелагониската епархија поради неплатен персонален данок кон државата. На удар се селските попови, кои останаа без покуќнина. Како куриозитет, селскиот поп во мариовското Старавина, Илија Лажовски, треба да и' плати 10 илјади евра персонален данок на државата.

„Како може пензиониран свештеник од Старавина каде што во цела област има триста верници и е без прилив на средства да плати речиси 10 илјади евра данок. Неговите примања месечно не се поголеми од 3.000 денари. Ова е апсурдно. Извршители одат и конфискуваат и кај други свештеници, седум-осум свештеници ги оставија без телевизори, без маси, без возила. Вршат притисок да им ја наплатат дури и каматата“, се пожали владиката Петар.

Тој смета дека ваквата состојба што ја наметна државата е неправедна кон црквата. Причината е што даночниците не ја согледале реалната состојба на терен, туку само се повеле според законот. Очекува надминување на проблемот по европски терк или како во Австралиско-новозеландската епархија каде што свештениците плаќаат данок според заработеното.

Меѓутоа, запрашан дали поповите кои возат џипови се солидарни со своите колеги од сиромашните парохии, владиката Петар вели: свештениците во неговата епархија живеат само со наградата од верниците и не примаат плати.

„Кога медиумите кажуваат дека поповите возат џипови, треба да кажат дека се дотраени како нашето „ауди А 4“, старо единаесет години. И треба ли владиката или свештеникот да ризикува да загине кога оди на далечен пат и дека не смее да го обнови возилото?“, возврати владиката Петар. Притоа напомена дека се согласува со јавноста ако некој од свештениците води луксузен живот да биде жигосан поради тоа. Но, не и ако неговите потреби се реални.

Преспанско-пелагонискиот митрополит смета дека се обесправени и црквите од страна на ЕВН, бидејќи плаќаат индустриска струја. Оттаму тој предупреди дека големите трошоци ќе бидат на штета на црковниот имот.

,,Кога треба да плаќаме струја не' третираат како фирма, а кога треба да го вратиме ДДВ, велат дека сме приватно лице. Можеби ќе треба да продадеме некои цркви за да можеме да ги платиме сметките. Плаќаме индустриска струја, а со неа се користиме само за да се затоплат просториите на служителите. Најтешко им е на селските цркви кои не можат да ги платат ваквите барања“, предупреди владиката.

Митрополитот Петар возврати и на повикот на Солунскиот митрополит кој неодамна упати апел до грчките верници да не доаѓаат во Македонија. „Не доаѓаат кај нас грчки верници, туку Македонци од Егејскиот дел на Македонија. Грчките верници се од Олимп надолу. Мојот колега, братот од Солун, има забуна и треба да се преиспита. И да не го лажат светот, да не носат две лубеници под една пазува зашто и самите велат дека тие биле Македонци. Тоа се политички изјави оптоварени со шовинизам и национализам“, рече владиката Петар. (А.Б.)