Романија не може да не' внесе во НАТО

Романија безрезервно ја поддржува интеграцијата на Македонија во ЕУ и во НАТО, но одлуките за тоа се носат колективно од сите земји-членки и затоа е потребно да се реши спорот за името, порача романскиот претседател Трајан Басеску, по средбата во Букурешт со претседателот Ѓорге Иванов.

- Романија сама не може да одлучи ниту за влегување во НАТО ниту за прием во ЕУ. Таквата одлука треба да биде донесена колективно од страна на сите земји-��ленки без разлика дали зборуваме за ЕУ или за НАТО. Без разлика кој ќе биде текот на настаните меѓу Македонија и Грција, Романија секогаш безрезервно ќе го поддржува вклучувањето на Македонија во НАТО и во ЕУ. Ние немаме ниту еден мотив да не ја поддржиме Македонија за нејзиниот влез во ЕУ, нагласи Басеску.

Проблемот, додаде романскиот претседател, е билатерален и се' додека постои вето, не ќе може да има прогрес. Тоа е мојот повик – пронаоѓање билатерално решение за спорот за името.

Тој додаде дека од интерес на Романија е земјите од Западен Балкан да влезат во ЕУ и во НАТО и оти во овој момент, според нив, држави што можат да имаат забрзан процес на пристапување во овие структури се Македонија, Црна Гора и Србија.

Претседателот Иванов се заблагодари за поддршката што и' ја дава Романија на Македонија во евроинтегративните процеси. (МИА)