Од Брза помош ќе советуваат по телефон?

Со новиот начин на плаќање што го заговара ФЗО, лекарите ќе штедат, а помалку ќе излегуваат на терен

Јасмина Јовановска

Лекарите од Итната медицинска помош место да им укажуваат прва помош на болните ќе им бајат. Со новиот начин на финансирање што го заговара Фондот за здравствено осигурување лекарите ќе бидат принудени да штедат, па повеќе ќе делат совети по телефони, а помалку ќе излегуваат на терен. Со новиот модел на плаќање на Брза помош, кој, како што дознаваме, се планира да стартува во мај в година, се предвидува место по дадена здравствена услуга, Службата за итна медицина да добива месечна квота по бројот на медицински тимови. Според сегашните пресметки, еден медицински тим ФЗО ќе го плаќа по 124.000 денари месечно, средства со кои ќе треба да се намират платите на возачот, на медицинската сестра и на лекарот, трошоците за бензин и за амортизација на возилата, како и ампуларната терапија за болните. Новините во плаќањето во петокот им биле соопштени на управителите на здравствените домови.

Со месечната квота што ФЗО ја определил да му ја додели на еден медицински тим, кога ќе се покријат трошоците за плати и за бензин, речиси нема да останат пари за лекови, реагираат лекарите. Во скопската Служба за итна помош, септемвриската исплатена плата на возач е 27.000 денари, на медицинска сестра со дежурства е 36.000 денари и на лекарот е 44.000 денари. „Само да се поделат парите за платите, од дадените 124.000 денари ќе останат 17.000 денари. За што попрво, за бензин или за лекови“, па лекарите прашуваат со што ќе ги лекуваат итните случаи, кај кои здравствената состојба не дозволува одложување. Или, пак, поради ограничените средства ќе бидат принудени да штедат лекови.

„Со плаќањето по медицински тимови, што е меѓународно искуство, нема намалување на средства, туку напротив ФЗО ќе го зголеми буџетот за Брза помош“, тврди портпаролот на ФЗО, Бранко Аџигогов. Така, на пример, Берово, кое сега добива 2,3 милиони денари, со плаќањето по тимови ќе добива 5,7 милиони денари за итна помош или, пак, на Тетово место сегашните 11,8 милиони денари, ќе му се плаќаат 18. Намера на Фондот е да се развива итната медицинска помош што била укината во внатрешноста.

За сметка на развивањето на итната помош во внатрешноста, најверојатно, ќе настрада Службата во Скопје. Сега еден реализиран повик ФЗО го плаќа 1.200 денари, или месечно, ако во просек има по 80 повици дневно, добива околу 2,8 милиони денари. Со новиот начин на плаќање скопската Итна служба ќе добива двојно помалку пари. Сега во скопската Служба има десет тима, ако секој тим се плаќа по 124.000 денари, значи, месечно ќе добива околу 1,2 милиони денари. Од Фондот, пак, велат дека месечната квота е доволна за сите трошоци и не може да се случи да снема пари зашто пресметките се направени врз основа на анализа на досегашната потрошувачка на бензин и на ампуларна терапија на скопската Служба. Но, на новинарската забелешка дека обемот на работа не е ист на скопската и на која било друга итна служба во земјава, а ќе добиваат иста квота по тим, портпаролот Аџигогов вели дека сите тимови не работат исто, а сумата од 124.000 денари е земена како просечна сума и е во работна верзија. Тој не одговори што ќе се случи во случај ако се надмине сумата од 124.000 денари, дали Брза помош ќе генерира долгови или ФЗО ќе одобри финансиска инјекција.

Фондот, пак, излезе со свои математики. Според ФЗО, ако се исплатат платите, за бензин и за лекови ќе останат околу 33.000 денари, не 17.000 денари. Сумата е доволна ако се знае дека лековите се набавуваат централно.