„Топлификација“ ќе наплаќа и за исклучено парно

И оној што веќе и' откажал доверба на компанијата ќе мора да плаќа 50 отсто од сметката, за да не се префрли трошокот кај соседот

Соња Маџовска


Корисниците на парно греење не се веќе лути, туку се несреќни што не знаат кого да обвинат, каде да се пожалат и каде да ја бараат вината за високите цени што ги плаќаат за топлинска енергија. Но најлошото очигледно ќе дојде кога ќе разберат дека и нема веќе да имаат можност ниту да се исклучат кога нема да можат да ги плаќаат сметките, или дека оние што веќе го сториле тоа ќе мора да плаќаат 50 отсто од сметката.

Новиот правилник што го подготвува Регулаторната комисија за енергетика ќе ја прелее чашата. Според првата можност, оној што ќе се исклучи од парното ќе мора да плаќа и натаму 50 отсто од сметката, за да не се префрли трошокот кај соседот. За ова прашање најверојатно ќе се расправа на следната седница

на Регулаторната комисија за енергетика, со што ќе се врати всушност стара одредба, која се применувала пред четири години. Тоа значи дека оние кои се откажале од централното греење ќе мора да плаќаат 50 отсто од сметките, без разлика од местоположбата на станот во зградата.

Ова би требало да важи за оние што веќе се исклучиле, но уште полошо е за оние што допрва размислуваат за излегување од мрежата на "Топлификација", а нив ги има многу. Тие тоа воопшто нема да можат да го сторат тоа поединечно, односно тоа ќе може да се направи само доколку станарите од цела зграда се согласни да преминат на друг начин на греење. Тоа важи за оние згради каде што цевките поминуваат низ сите станови. А такви се речиси сите постари згради, додека во новите тоа не е случај.

"Ова е веќе лудост, што мисли оваа држава. Цената парното од една страна постојано расте. Кога и да побара 'Топлификација', Регулаторната комисија тоа го одобрува, па сега уште и да не може да се исклучиме е навистина е претерано. Неодамна донесов одлука да го откажам ова греење и да се топлам на струја, преку директни грејачи вклучени на постојните радијатори. И тоа и ќе го сторам. Пресметав дека ми е тоа многу поисплатливо и дека месечно ќе плаќам по околу 100 евра за струја. Барем ќе се греам јас кога сакам", вели М.Д. од Скопје, жителка на Аеродром.

"Со оглед на тоа што се грееме шест месеци во годината, а плаќам 12 месеци во годината за парно греење по 3.500 денари, тоа значи дека за шест месеци греење на 'Топлификација' и плаќам по 7.000 денари. Тоа го нема никаде".

Ова се само дел од острите реакции на граѓаните, кои не знаат каде да се обратат за да побараат помош за проблемите што ги имаат со "Топлификација".

Од Организацијата на потрошувачи на Македонија велат дека не се известени од Регулаторната комисија за новите правилници што се подготвуваат, но дека ќе реагираат, бидејќи и кај нив деновиве почнале да се јавуваат потрошувачите и да прашуваат што навистина опфаќа тој.

"Со оглед дека имаме доста прашања околу подготовката на нов правилник, а бидејќи немаме информација директно упатена до Организацијата на потрошувачи дека истиот е во подготовка, ние ќе доставиме приговор до Регулаторната комисија, до Министерство за економија, како и до Народниот правобранител во кој ќе бараме доколку се носи нов правилник да се слуша и ставот на граѓаните по ова прашање. Носењето на правилникот секако е врзано за Законот за енергетика и треба да се види и правната основа за ова. Куќните совети сигурно доколку се организирани ќе имаат свои мислења, можеби ќе бидат и поделени, но не смееме да ги запоставиме", вели Маријана Лончар-Велкова од Организациајата на потрошувачи.

Таа додаде дека не може да ја присилат Регулаторната комисија да ги повика да учествуваат во подготовката на правилата.

Од Регулаторната комисија и од "Топлификација" не сакаат да коментираат, но потврдија дека се подготвува нов правилник. Во состав на новиот правилник Регулаторната комисија во моментов разгледува и уште неколку други, по се' изгледа за да ги одоброволи граѓаните за овие првите, кои се знае дека ќе предизвикаат големи реакции. Регулаторната комисија размислува и да го зголеми времетраењето на дневното греење и наместо до 21 часот да се грее до 22, како и тоа порано да започне грејната сезона, уште во септември.

Само што се стопли надвор, „Топлификација“ не' излади дома

И додека Регулаторната комисија размислува да го продолжи греењето, "Топлификација" само го чека првиот зрак потопло сонце за да го исклучи парното.

Само што почнаа високите надворешни температури, веднаш се изладија становите. "Топлификација" одлучи да ги исклучи радијаторите, повикувајки се на правилникот за испорака на топлинска енергија според кој, доколку три дена по ред температурата во 21 часот е над 12 степени се исклучува греењето во становите. И што е бесмислено, за ова исклучување потрошувачите нема да добијат пониски сметки. Скопјани, деновиве велат дека е крајно време некој да го стопира монополот на "Топлификација" , бидејќи не се во прашање веќе само високите сметки, туку и тоа што при парно тие вклучуваат радијатори, греалки и клима уреди, што е случај деновиве. Ако уште им се скрати и правото да го изберат видот на енергија за затоплување, е тогаш веќе ќе биде премногу. (С.М.)