Нема закон за стечајците

Стечајците најавуваат продолжување на протестите

Маја Томиќ

Ниту едномесечниот штрајк со глад, ниту многубројните протести низ улиците на Скопје секој вторник, ниту заканите, ниту молбите до Владата... Се' беше безуспешно за стечајците, кои не успеаја да издејствуваат од власта промена на ставот и прифаќање на нивните барања за материјално згрижување. Законот, со кој околу 10.000 стечајци требаше да си обезбедат материјален статус, доживеа фијаско. Парламентарното мнозинство завчеравечер, по речиси целодневна жестока дебата, не го изгласа законот поднесен од група пратеници од опозициските СДСМ, НД, ЛП, НСДП и Нова алтернатива.

Наелектризираната атмосфера меѓу парламентарците, по расправата излезе од контрола, која за среќа беше спречена.

Стечајците, од кои голем дел го чекаа исходот пред Собранието, а тројца ја следеа расправата, беа крајно разочарани од власта. Според власта, оваа група невработени била од приватни фирми, а не од државни, и тие се веќе опфатени со постојниот Закон за осигурување и вработување во случај на невработеност.

„Разочарани сме многу од Владата и од пратениците на ВМРО-ДПМНЕ. Најавуваме продолжување на протестите и на притисоците врз Владата, а се договоривме да ги собереме сите сметки и да и' ги однесеме на Владата за да ни ги плати“, изјави претседателката на Здружението на стечајците, УНИТ, Лилјана Георгиевска.

Од собраниската говорница завчера можеше да се слушне се' само не расправа по текстот на законот. Дека него го бара опозицијата поради политички поени, не од социјални причини, дека стечајците се злоупотребени од опозицијата, следеа караници и обвинувања, дури и лични навреди меѓу претставниците на власта и на опозицијата за тоа кој е виновен за стечајците, кој, кога, зошто и како ја направил криминалната приватизацијата, колку фирми биле затворени...

Губитниците од транзицијата, како што ги нарече стечајците Тито Петковски од НСДП, останаа ни ваму ни таму, млади се за пензионирање, а стари за работа. Тој апелираше политичките партии да не се надмудруваат, туку како одговорни политичари да направат приоритети според парите во буџетот.

Маријанчо Николов од СДСМ посочи дека со закон би се затворило прашањето за социјалната компонента на неправедната транзиција. Во спротивно, тие луѓе ќе продолжат да живеат на маргините на општеството. Според него, парите се најмал проблем за да се реши ова прашање, бидејќи се трошат големи буџетски средства за споменици.

Како и да е, неизгласувањето на предлог-законот значи дека 10.000 стечајци од времето на приватизација и натаму остануваат со нерешен социјален статус. Односно, дека нема да примат надомест од Агенција за вработување во висина од 30 отсто од просечната плата, како што стоеше во текстот на законот, се' до нивно вработување или пензионирање. За тоа требаше да се издвојат 12 милиони евра годишно од буџетот.