„Смртта на Ерусалим“ во сефардското списание “Лос Муестрос”

Новелата на Томислав Османли ќе биде објавувана во неколку следни броеви на интернационалното списание „Лос Муестрос“ кое излегува во Брисел

Новелата „Смртта на Ерусалим“, која е дел од книгата со еврејски теми од Македонија и од поширокиот регион, насловена „Светилка за Ханука“ од македонскиот автор Томислав Османли, ќе биде објавувана во неколку следни броеви на интернационалното списание „Лос Муестрос“ кое излегува во Брисел.

Во најновиот број на ова меѓународно списание, кое ја афирмира сефардската култура и историја, објавен е првиот дел од новелата во превод на англиски.

„Смртта на Ерусалим“ раскажува за подготовките и конечното уништување на една од најстарите еврејски и најголемата сефардска урбана заедница во светот, онаа на Солун, и нејзиното масовно уништување во Втората Световна војна. При тоа, во Аушвиц, но и во други нацистички логори на смртта во окупирана Полска биле однесени над 50.000 солунски Евреи од кои преживеа и успеал се врати само мал број страдалници.

Мотивите за оваа комплетна објава на книгата од Османли, главниот уредник на списанието Моисе Рахмани, инаку истакнат автор на книги и публикации од животот и културата на Сефардите, го објаснува на следниот начин:

- Книгата на Томислав Османли „Светилка за Ханука“ претставува нова свеќа додадена во тој исклучителен свеќник. Ова дело трага по еврејскиот живот, со неговите мигови на радост и со миговите на тага. Авторот не поканува на откривање на историјата на таа заедница, со надежта како нејзина позадина (...) Авторовата нарација е огнена, неговиот стил запалив. Зборовите бележат слики во кои читателот навлегува и учествува. Томислав Османли восхитувачки ги доловува ситуациите, ликовите. Кога еднаш се отвора, оваа книга повеќе не се напушта. Таа светлина не осветлува, не просветлува и не тера и ние да ја зрачиме, вели Рахмани.

Новелата ќе се објавува во продолженија во печатена и во електронска веризија на списанието „Лос Муестрос“. Инаку ова е 10. по ред објава на прозен текст од Османли во „Лос Муестрос“.