Владика Петар: Има политика во австралискиот црковен спор

Митрополитот тврди дека во случајот се замешани генералот Ангелов и градоначалникот на Охрид, Петрески

Битола - Политиката замешала прсти во црковниот спор во Австралиско-новозеландската епархија, тврди владиката Петар, кој вели дека во случајот се вмешани и лидерот на „Достоинство“ Стојанче Ангелов и охридскиот градоначалник Александар Петрески. Владиката Петар тоа го поткрепува со свои информации, според кои во групата што отишла во Црна Гора да го моли владиката Михајло да го хиротониса архимандритот Царкњаз во владика, биле Игор Александров и генералот Стојанче Ангелов.

„Има политика ако во целата оваа работа го земете предвид прашањето за хиротонијата на Царкњас и на некои други игумени кои ќе станеле владици во Австралија. Во групата што отиде во Црна Гора беше и генералот Ангелов, тој беше предложен од Александров за иден пратеник во македонското Собрание. Гледано од тој аспект, има мешање и на политиката“, рече Владиката Петар додавајќи дека и охридскиот градоначалник Петревски кога бил во Австралија се среќавал со дел од „расколниците“ во таа далечна земја.

„Кога Охридското Езеро се закануваше да го поплави Охрид, Петревски наместо да го спасува градот, беше на средба со Ристо Алтин, со расколници за да ги поддржи и да ги велича на некоја прослава. И таму тоа беше исклучиво терање политика“, рече владиката Петар.

По последните случувања во Австралија тој жали за поделеноста на верниците во Австралиско- новозеландската епархија.

„Нема човек на кого не би му било жал што има поделеност. Но, со сила никого не можете да натерате да биде верник. Луѓето си остануваат и натаму така како што си се скроиле. Кај некои луѓе тешко е да дојде до промена. Оти токму тоа е покајанието“, рече владиката Петар.

Што се однесува, пак, до судските трошоци за спорот околу црковниот имот во Австралија, владиката Петар вели дека тие паѓаат на товар на компаниите, а не на МПЦ.

„Одлуката за плаќање на трошоците не се менува, без оглед на тоа што спорот е на Апелација. Што ќе се случува понатаму, ќе биде друга постапка. Тука нема што да плаќа МПЦ, ќе плаќаат или тужените или тужителите. Значи, во овој случај ќе платат тужените “, рече митрополитот Петар.

Инаку, владиката Петар вели дека имотот во Австралија не може да се запише како имот на МПЦ се' додека не се донесе закон за старателство над имотите. За да се направи тоа треба сите црковни општини да се согласат дека имотот ќе се префрли во корпорација за Македонската православна црква. Потоа тоа треба да се регулира преку катастар, но дотогаш, вели митрополитот Петар, мора да стои на име на лица. (А.Б.)