Стаса последната тура двокатни автобуси

Со новите 79 автобуси, заврши најавената обнова на возниот парк на ЈСП. Сега тој има 215 двокатни, 16 минибуси и 81 нископоднини „украинки"

Заврши најавената обнова на возниот парк на ЈСП „Скопје“. Стаса и последната тура 79 автобуси од кинескиот „Јутонг“, 64 двокатни „обични“ и 15 панорамски автобуси. Симболично, тие беа презентирани денеска како и досега на паркингот пред спортскиот центар „Борис Трајковски“. Така, сега ЈСП на располагање има вкупно 215 даблдекери, 16 минибуси и 81 нископоднин „украинки“ од производителот „Лаз“. Сите донација од Владата со вкупна вредност од 57 милиони евра.

Новонабавените автобуси се презентираа во присуство на советници, директори, политичари...Градските власти се пофалија дека автобусите имаат мотор „каминс“ од англиско производство, германско подвозје „ЗФ“ и се комплетно климатизирани.

„Автобусите имаат и дигитален тахограф и автоматски управувана рампа за инвалидски и детски колички, а на панорамските автобуси покривот електронски им се отвора. Изгледот на главниот град значително е изменет и сега скоро и да ги нема старите автобуси“, рече градоначалникот Коце Трајановски, најавувајќи дека до април годинава треба да бидат пуштени во употреба и 50 нови автобуски постојки, а до крајот на 2013 сите 226 планирани.

Министерот за транспорт и врски, Миле Јанакиевски рече дека старите автобуси кои претходно се користеле во главниот град, освен што биле премногу стари, го загадувале воздухот и не биле соодветно затоплени и климатизирани.

Премиерот Никола Груевски, пак, нагласи дека автобусите значат крај на проектот во кој, како што рече, многумина не верувале, затоа што со години наназад многу градоначалници и политичари ветувале дека ќе го решат проблемот, но никој не ги сменил автобусите стари и преку 30 години.

„Автобусите се дојдени благодарение на подржувачите, но и на противниците. Без нивното зборување и критики немаше да постигнеме таков политички ефект. Скопје доби нов автобуски превоз според сите европски стандарди онака како што доликува на една европска метропола. Над сто илјади граѓани кои живеат, работат или привремено престојуваат во Скопје можат да ги користат автобусите“, истакна Груевски. (Б.Ш.)