04.01.2013, 15:42 Царината лани наплати повеќе средства од планираните
Царинската управа минатата година инкасирала во буџетот 48 милијарди денари. Зголемување, како што информира директорот Ванчо Каргов, е над планираното и поголемо од она во 2011 година.
„Во 2012 година се наплатени вкупно 49.963 милиони денари приходи од увоз, или 800.000 евра, што е за три проценти повеќе во однос на 2011 година. При тоа од царина и други царински давачки се наплатени 4.094 милиони денари, што е за 7 отсто повеќе во однос на 2011 година и за 1,65 проценти повеќе во однос на проектираните“, рече Каргов.
Тој додаде дека по основ на акциза од увоз и внатрешен промет е наплатен износ од 16.595 милиони денари, што е за 3,78 отсто повеќе од проектираните. Најголемиот дел се од нафтените деривати, потоа автомобилите, алкохолот и цигарите.
Царината лани донела и 1.329 извршни управни реше��ија за дополнителна наплата на царински долг во износ од 515 милиони денари од кои се наплатени 1.150 решенија со износ од 198 милиони денари.
Каргов потенцира дека Царината поднела 91 кривична пријава против 141 правни и физички лица со кои се избегнати давачки околу 300 милиони денари. Соработката со бизнис-секторот тој ја оцени како одлична. (Ек.Р)
|
