Џон Бојнер реизбран за претседател на Претставничкиот дом на САД

Републиканецот Џон Бојнер доби втор двегодишен мандат како претседател на Претставничкиот дом на САД.

Бојнер ја победи лидерката на демократите Нанси Пелоси со 220 наспроти 192 гласа на првиот ден од седницата на новиот состав на Долниот дом на Конгресот, во кој републиканците имаат мнозинство.

Ова е 113-тиот Конгрес на САД и во својот состав има рекорден број жени.

Со 101 место од вкупно 535 во двата дома на Конгресот, или 19 проценти, жените се за седум повеќе во однос на претходниот состав на законодавниот орган на САД.

Сенатот има 20 жени од вкупно 100 претставници, меѓу кои 16 се од Демократската партија. Демократите имаа мнозинство во Горниот дом на Конгресот со 55 места од вкупно 100. Во Претставничкиот дом жените се 81 од вкупно 435 претставници.