„Балкан енерџи“ сака да инвестира и во „Чебрен“ и „Галиште“

„Балкан енерџи груп“ (БЕГ) е македонска компанија со странски капитал основана од „Кардикор инвестмент ЛТД“ и „Битар холдинг ЛТД“. На чело на компанијата стои Кристина Симеонова-Стојменова, а седиштето на фирмата е на истата адреса со гасната централа во општина Гази Баба. Плановите на „Балкан енерџи груп“ се да инвестира во производствени енергетски капацитети и дејности во насока на развој на енергетскиот сектор во Македонија, внесување нови технологии и отворање нови работни места.

Според најавите од компанијата, освен за снабдувањето на главниот град со топлинска енергија, заинтересирани се и за инвестирање во мегапроектот „Чебрен“ и „Галиште“, за што веќе подигнале тендерска документација.

„Во овој момент БЕГ има намера да инвестира во мегапроектот ’Чебрен‘ и ’Галиште‘, како и во други проекти за производство на електрична и топлинска енергија во Скопје, пред се' заради зголемување на квалитетот на услугата кон граѓаните, преку подобрување на енергетската ефикасност на енергетскиот систем и неговите перформанси. Со реализација на овие активности, БЕГ во голема мера ќе придонесе за енергетската независност и стабилност на Македонија. Притоа, БЕГ сите свои активности ги изведува во согласност со највисоките еколошки стандарди и со високо ниво на општествена и корпоративна одговорност“, информираат од компанијата. (С.Н.)