Две години условно за штипскиот кандидат за градоначалник од СДСМ

Основниот суд во Штип донесе решение со кое го товари Здравко Коцев за злоупотреба на функцијата директор во 2006 година

ИВАН БОЈАЏИСКИ



Штип – Кандидатот за градоначалник на Штип од редовите на опозициската коалиција, Здравко Коцев, е осуден условно на затворска казна во траење од две години. Казната ќе се реализира во случај ако Коцев во наредните три години направи ново кривично дело. Решението кое го донесе судијката од Основниот суд во Штип, Јулијана Неткова, се' уште не е правосилно и осудениот има право на жалба. Коцев се товари за злоупотреба на функцијата директор на ЈП „Исар“ во делот на јавните набавки за реновирање на бањата „Кежовица“.

Во градот под Исарот оваа пресуда повеќе се става во политички отколку во правен контекст. Особено поради времето на нејзиното изрекување, три месеци пред локалните избори на кои Коцев ќе учествува во битката за градоначалник на регионалниот центар на истокот.

„Информиран сум за пресудата, но се' уште ја немам добиено и не можам да ја коментирам. Знам само дека се работи за тужба поднесена уште во 2006 година од Јавното обвинителство, а по барање на СВР - Штип и тогашниот началник Ѕвонко Каширски. Не знам зошто на судот му беа потребни цели шест години за да донесе пресуда и тоа токму пред локалните избори, сега кога сум опозициски кандидат за градоначалник. Засега не сакам ништо да коментирам“, вели Коцев.

Борче Цеков, шеф на изборниот штаб на Коцев, смета дека се работи за одлука со политичка заднина. „Актуелната власт се плаши од нашиот кандидат и ги употребува сите механизми да го девалвира неговиот углед во јавноста. Секому му е јасно дека е во прашање одлука донесена од дневнополитички потреби, а не за да се штити законот. Кога нашиот кандидат ќе ја добие пресудата, ние, како негов изборен штаб, ќе го кажеме своето“, ни изјави Цеков.

Во 2006 година Здравко Коцев доби кривична пријава за злоупотреба на функцијата директор на ЈП „Исар“ во делот на јавните набавки за реновирање на познатата бања „Кежовица“. Пријавата го товареше дека набавките ги правел на делови, а не како целина, што било кривично дело според Основното јавно обвинителство.

„Ангажираните вештаци докажаа дека во овој случај не постоела никаква злоупотреба и секој денар бил потрошен за намената за која бил вложен. По ова, Основниот суд донесе ослободителна пресуда, на која поднесе жалба Основното јавно обвинителство, па предметот се најде пред Апелацискиот суд во Штип. Тој го врати предметот на Основниот суд на повторно разгледување и тогаш судијката Неткова, која прво донесе ослободителна пресуда, ми ја изрече условната затворска казна. Сигурно е дека ќе се жалам, па ќе видиме како ќе се одвиваат работите во иднина“, вели Здравко Коцев.

Стојан Михов, судија во Основниот суд во Штип, кој е и портпарол, официјално ни ја потврди пресудата. „Апелацискиот суд оценил дека постојат нови докази во овој случај и го вратил делото на повторно одлучување. Точно е дека налог за истрага е даден во 2006 година, но процесот се одолжил зашто не се работи за лесен предмет, бидејќи истражниот судија дошол до нови сознанија, па за утврдување на фактичката состојба требало повеќе време. Врз основа на новите сознанија, на Здравко Коцев му е изречена условна казна затвор од две години. Одлуката е донесена во ноември минатата година и таа нема никаква врска со политиката, бидејќи судот работи врз основа на факти“, вели Михов.

Граѓаните на Штип сега се прашуваат дали со ваквата судска одлука не се суспендира кандидатурата на Коцев за градоначалник. Бидејќи, според член 7 од Изборниот законик, кандидат за пратеник, член на Советот и градоначалник не може да биде лице осудено со правосилна судска одлука на безусловна казна затвор во траење над шест месеци, а чие издржување се' уште не е започнато. Согласно со овој закон, за Коцев не постои законска пречка со која неговата кандидатура за градоначалник би била невалидна. Без оглед дали опозицијата ќе остане на ставот дека нема да учествува на мартовските локални избори, во Штип се цени дека носењето ваква судска одлука на нецели три месеци пред изборите е лоша порака за нашата судска власт.