02.01.2013, 12:32 Алаѓозовски, Крајчев и Тоциновски добитници на „Прозни мајстори“
Со утрешното доделување на наградите, „Феникс“ ќе ја почне манифестацијата „Фестивал на чајот и читањето“ која ќе трае до 3 март
Роберт Алаѓозовски за романот „Готен“, Игор Крајчев за романот „Воини и херои“ и Васил Тоциновски за книгата раскази „Сушачко попладне“, се добитници на наградата „Прозни мајстори“ на издавачката куќа „Феникс“ и фондацијата „Македонија презент“. Одлуката ја донесе жирито во состав: Христо Петрески, претседател и Панде Манојлов и Виктор Шеќеровски, членови. Наградите на добитниците ќе им бидат врачени утре во аутлет-книжарницата н�� „Феникс“. Инаку, со доделување на наградите „Феникс“ ќе ја почне манифестацијата „Фестивал на чајот и читањето“ која ќе трае до 3 март.
Роберт Алаѓозовски во романот „Готен“ го проследува усното предание за доаѓањето на Сасите во Македонија, од нивното доселување на Балканот во 13 век, привилегиите, но и напорната рударска работа што ја вршеле под средновековните владетели... „Воини и херои“, пак, на Игор Крајчев, зборува за целосно измислена земја, со животни, езера, народ, јазик, енциклопедиски измислена земја која се вика Креидон. Збирката раскази „Сушачко попладне“ на Тоциновски е напишана во Риека и е создадена во специфичниот далматински и медитерански амбиент.
Досегашни добитници на наградата „Прозни мајстори“ се: Ермис Лафазановски, Игор Исаковски, Горјан Петревски, Ким Мехмети, Александар Прокопиев, Томислав Османли, Трајче Кацаров и Блаже Миневски. (Т.И.)
|
