Кризата во еврозоната добива контури на психолошки распад на Европа

Италијанскиот премиер Монти изрази загриженост дека тензиите во еврозоната доведуват до свртување на земјите едни против други

Италијанскиот премиер Марио Монти во интервју за денешното издание на германското списание „Шпигел“ ги повика европските партнери на Италија за поголема ангажираност во надминувањето на финансиската криза во еврозоната.

- Тензиите кои се појавија последите години во еврозоната веќе добиваат контури на психолошки распад на Европа, истакна Монти и предупреди дека доколку еврото се претвори во фактор за распаѓање на Европа, тогаш ќе бидат разурнати основите на самиот европски проект.

Монти изрази загриженост дека тензиите во еврозоната доведуват до свртување на земјите едни против други.

Тој нагласи дека за тоа прашање разговарал со германската канцеларка Ангела Меркел и `и пренел дека Италијанците чувствуваат се поголема огорченост кон Германија и понекогаш кон неа поради начинот, на кој Берлин управува со должничката криза.

Монти ги повикува своите колеги од еврозоната да не дозволат одлуките на нивните парламенти да ги спречат да преземат одредени чекори и побара од нив да ја задржат слободата на дејствување, бидејќи во спротивно Европа ќе биде изложена на ризик целосно да се распадне.

Во меѓувреме гувернерот на италијанската Централна банка Инацио Виско изјави дека Италија во моментов нема потреба од помош од европскиот спасувачки фонд за да се справи со растечките камати на италијанските обврзници.

Тој во интервју за италијанскиот весник „Република“ истакна дека од пазарите ќе зависи дали Рим во иднина ќе побара помош.

- Доколку пазарите се уверат дека Италија го променила текот на финансиската криза, ги надминала препреките пред економскиот раст и покажува дисциплина во трошењето на државните средства, тогаш потребата Рим да бара помош отпаѓа, нагласи Виско.

Тој прогнозира дека растот на италијанската економија во 2013 година ќе биде мошне мал.