Изложба на Атанас Ботев во „Око“

Во најновите дела Ботев остварува дијалог со своето алтер-его материјализирајќи ги своите потсвесни содржини, преокупации и опсесии

Во галеријата „Око“ вечер ќе биде отворена самостојна ликовна изложба на Атанас Ботев, насловена „Луцидно синестетички дијалог“. Авторот ќе се претстави со 13 слики работени во акрил и масло на хартија и на платно.

Како што информира организаторот, во најновите дела Ботев остварува дијалог со своето алтер-его материјализирајќи ги своите потсвесни содржини, преокупации и опсесии (СФ, хорор, стеам-пунк, горе, психоделија, поп-арт...) во сликарски артефакти со суреална провиниенција.

- Во средиштето на изложбата се наоѓаат бројни прашања: како нашата современа култура го обликува психичкото ниво, профилот на личноста, однесувањето на поединецот; кои се потиснатите стравови, желби и фрустрации на современиот човек; поимите правда, морал, етика се доведуваат во прашање или пак цинично се исмејуваат итн...Во делата може да се насети и извесен неспокој кој е рефлексија токму на општествените превирања и турбуленции но тоа е неизбежно. Сликите се всушност огледало на нашата первертирана стварност во којашто западната цивилизација полека тоне обременета со својата сопствена декаденција, наведува организаторот.

Атанас Ботев (1973) дипломирал на Факултетот за ликовни уметности во Скопје (графика и графички дизајн), каде и магистрирал во 1999. Работи во повеќе медиуми: сликарство, графика, цртеж, стрип, инсталација, перформанс. Имал самостојни изложби во Њујорк и Нирнберг и учествувал на повеќе групни и во Македонија и во странство. Добитник е на повеќе награди. Работи како раководител на Отвореното графичко студио при Музејот на град Скопје.

Изложбата во галеријата „Око“ ќе биде отворена до 9 октомври.