27.09.2012, 11:47 Македонската филхармонија стартува со концертот „Ш, ш, ш“
Вечерашниот концерт е насловен „Ш, ш, ш“ поради иницијалите на композиторите Шуман, Шуберт и Шенберг, a ќе настапи швајцарскиот пијанист Франческо Пјемонтези
Со вечерашниот концерт симболично насловен „Ш, ш, ш“, вечерва во Домот на АРМ во 20 часот, почнува новата концертна сезона на Македонската филхармонија. Под диригентство на маестро Јануш Пшибилски од Полска, чест гостин кој раководи со нашиот оркестар, ќе бидат изведени Концертот за пијано и оркестар од Роберт Шуман, ретко изведуваната Симфонија број 3 од Франц Шуберт и прв пат во Македонија ќе прозвучи „Рондо Цингарезе“ од Клавирскиот квартет на Јоханес Брамс, во оркестрација на Арнолд Шенберг. Вечерашниот концерт е насловен „Ш, ш, ш“ поради иницијалите на композиторите Шуман, Шуберт и Шенберг.
Инаку, како солист на пијано, кој ќе го изведе Концертот од Шуман, ќе настапи швајцарскиот пијанист Франческо Пјемонтези, кој зад себе има завидна биографија. Музичката критика високо го оценува концертниот израз на Пјемонтези, кој е избран за Млад уметник на годината од Би-би-си. За него критичарите ќе напишат дека е „млад уметник со исклучителна зрелост“, а неговата интерпретација поседува „јасна музичка мисла, софистицирана техника и фантазија“. Како солист особено се истакнува во неговата интерпретација на делата на Моцарт, Бетовен, Шуман, Брамс, Шопен, Дебиси и Равел, а концертно настапува со Лондонската филхармонија, Симфонискиот оркестар на Би-би-си, Израелската филхармонија, Камерата Салцбург итн., остварувајќи соработки со диригенти како: Зубин Мехта, Јиржи Белохлавек, Сакари Орамо, Васили Петренко, Михаил Плетњов, Тиери Фишер, Димитри Китајенко и многу други. Пјемонтези снима за „ЕМИ Класикс“ како дел од серијата „Марта Аргерич и пријателите“, а исто така и за „Клавес рекордс“ за кои остварува високо оценет запис на дела од Роберт Шуман. Неговиот последен албум за „Аванти класик“ содржи музика на Хендл, Брамс, Бах и Лист.
Инаку, како што соопштуваат од Македонската филхармонија, концертната сезона 2012/13 ќе изобилува со атрактивни солисти и диригенти, а задржан е и форматот на циклусите „Виртуози“, „Лауреати“ и „Кирилица“.
Под мотото „Купи билет за Македонска филхармонија“, промотивната продажба на претплатничките циклуси „Фортисимо“, „Форте“, „Мецо“ и „Пијанисимо“, трае до 27 септември. (Т.И.)
|
