Аврамопулос ја обвини Македонија за ширење иредентизам

Шефот на грчката дипломатија во ОН обвини дека претседателот Иванов користи реторика од 19 век, а дека Македонија дека шири иредентизам

Грчкиот министер за надворешни работи Димитрис Аврамопулос во своето обраќање пред Генералното собрание на Обединетите нации, ја обвини Македонија дека шири иредентизам, а претседателот Ѓорге Иванов дека користел реторика од 19 век, како одговор на повикот на Иванов до членките на Обединетите нации дека треба на Македонија да и се обраќаат како што доликува на 21 век.

- Прашањето за името на Поранешната Југословенска Република Македонија е поголемо од неговата семантичка диманзија и е важен дел од задачата на смирување на иредентистичките тенденции и обидите за фалсификување на историјата на нашиот регион. Бев информиран за тоа што го кажал претставникот на Поранешната Југословенска Република Македонија денес во Генералното собрание. Искривувањето на реалноста пред целата меѓународна заедница и користењето на реторика од 19 век во 21 век е контра-продуктивно и не не води никаде, изјави Аврамопулос, кој се обрати пред Генералното собрание вчера, во доцните вечерни часови, јави дописникот на МИА.

Аврамопулос од говорницата ги повтори познатите грчки ставови за спорот, дека Македонија треба да прифати едно име со географска одредница, кое би се употребувало во сите ситуации – ерга омнес. Аврамопулос ги потсети делегатите во салата дека Македонија е географски регион во кој се содржани териториите на три држави, а најголемиот дел од Македонија и припаѓа на Грција.

Притоа, Аврампулос направи лапсус, кога кажа дека вториот најголем дел од географската област Македонија е во Бугарија, додека на Република Македонија и го остави најмалото парче.

Аврамопулос ја претстави Грција како голем инвеститор во Македонија и најави дека по евентуалното решение на спорот, Грција ќе биде најголем поддржувач на македонските евроатлански интеграции.