Британскиот премиер не знае што значи „Магна Карта“?

Дејвид Камерон се посрамоти пред Американците, откако не знаеше да објасни што значи „Магна Карта“, првата уставна повелба во светот изработена во Англија во 13. век 

Британскиот премиер Дејвид Камерон, кој престојува во Њујорк на годинешната сесија на Генералното собрание на ОН, се посрамоти пред Американците, откако не знаеше да објасни што на англиски јазик значи „Магна Карта“, првата уставна повелба во светот изработена во Англија во 13.век.

Камерон учествуваше во популрното шоу на Дејвид Летерман на американската телевизија Си-Би-Ес, настојувајќи да ги искористи главните настани од ова лето, 60-годишниот јубилеј на кралицата Елизабета, како и Олимпијадата и Параолимписките игри, за натамошна популаризација и афирмација на Велика Британија во САД и кај американската публика, но се покажа дека не знае некои основни работи поврзани со историјата и културата на земјата, чија Влада ја раководи повеќе од 2,5 години.

Британскиот премиер ја погоди годината на прогласувањето на „Магна Карта“ - 1215 година, за што во Лондон се подготвува голема прослава, за три години по повод 800-годишнината од донесувањето на овој исклучително значаен документ, со кои се поставени темелите на владеењето на правото во државите и е ограничено самоволието на властодршците, но не знаеше дека „Магна Карта“ преведена од латински јазик значи „Голема Повелба“.

Камерон се посрамоти и кога не можеше да одговори на прашањето на Летерман кој е авторот на „неофицијалната втора химна“ на Велика Британија, популарната песна „Владеј Британијо“, тврдејќи дека таа е дело на англискиот композитор Едвард Елгар. Британскиот премиер призна дека не слушнал за вистинскиот автор на оваа свечена песна, Томас Арн, направена врз основа на текстот на поетот Џејмс Томсон.

Ваквото непознавање на „општо познати работи“ од домашната историја и култура, наиде на критика и потсмев кај лондонските медиуми кои му забележуваат на Камерон, ученик на најпрестижниот колеџ во земјата Итон и студент на Оксфорд, дека не знае работи кои инаку се бараат од сите странци и имигранти при полагањето на тестот за стекнување право на жителство и на британско државјанство.

Токму Камерон и неговите ториевци инсистираат на тоа дека секој што сака да живее во Велика Британија и да биде нејзин државјанин, мора да знае за историјата и за културата на земјата.

Пред Камерон, гости во шоуто на Дејвид Латерман биле и поранешниот премиер Тони Блер, и тоа во два наврати, како и градоначалникот на Лондон, Борис Џонсон.