27.09.2012, 15:07 Ален Зекиров дојде на суд, но не дојдоа сведоците
Судскиот процес кој се води против Ален Зекиров, сега веќе поранешен телохранител на директорот на ДБК, од објективни причини беше преотворен, но и на новиот почеток обвинетиот за тешки дела против безбедноста во сообраќајот не кажа ништо ново.
Обвинетиот Зекиров пред кривичниот совет на скопска „единица“ потврди дека останува на она што веќе го изјавил на главен претрес одржан во декември минатата година.
И единствениот сведок кој денеска се појави во судницата рече дека останува на она што веќе го кажал пред истражен судија, а потоа беше наложено на следното рочиште да бидат обезбедени уште двајца сведоци и да биде повикано и вештото лице кој е сообраќаен инжињер.
Ален Зекиров се товари за настанот кој се случи во јуни 2009 година, кога тој на булеварот „Партизански одреди“, кај ТЦ „Буњаковец“, со мотоцикл „агуста“ го прегази 73-годишниот Симо Серафимовски, кој во тие моменти со велосипед минувал на обележан прешачки премин. Од ударот велисипедистот бил отфрлен десетина метри, а набргу потоа и починал. (Љ.С.)
|
