28.09.2012, 14:07 Камерон „го откачил“ Обама за да доигра тенис
„Кажете му на претседателот дека ќе му се јавам, сега играм тенис“, рекол британскиот премиер
Гласот за Дејвид Камерон за неговото „разладување“ повторно го прогонува откако еден пријател тврдеше дека одбил да прими телефонски повик од Барак Обама бидејќи привршувал игра тенис. Тврдењето го даде Чарли Брукс, стар пријател кој го познавал премиерот во Итон и живее блиску до него во Чипинг Нортон, Оксфордшир.
Сепак, Даунинг стрит ги оспори тврдењата, инсистирајќи дека официјалните записи покажуваат дека тие само играле тенис некогаш во Чекверс и во тоа време не бил заведен телефонски повик од Обама.
Брукс – кој заедно со својата сопруга, поранешна уредничка на таблоид, Ребека Брукс, беше вмешан во скандалот со телефонско прислушување – тврдеше дека играл тенис во официјалната резиденција на премиерот во Чекверс кога се јавил американскиот претседател.
Тој рече: „Еден ден играв тенис со него во Чекверс. Го добив првиот сет лесно, потоа тој го доби вториот сет, а потоа некој дојде до него и рече ’Обама е на телефонска линија за вас, премиере’“. „Помислив ’О.К., ќе треба да прекинеме тука’. Но, тој рече: ’Мислам дека имаме време за трет сет – кажете му на Обама дека ќе му се јавам’. Тој очигледно мислеше дека сум во тесно. И го победив во сетови, два наспроти еден“.
Камерон мораше да се држи далеку од Брукс и неговата сопруга Ребека откако нивното пријателство беше испитувано поради скандалот со телефонско прислушување.
Во интервју за „Рејсинг пост“, Брукс изрази надеж дека ќе останат пријатели со Камерон – за кого рече дека бил познат како „дебел и бучен“ кога двајцата накратко се затекле во училишните денови во Итон. Тој рече: „Тој не е лош – не е толку добар како мене; не може да ме победи. Ние сме многу добри пријатели; сега, секако, не можеме да се гледаме, но јас сум сигурен дека тоа ќе помине“.
Сторијата ќе поттикне непријатни сеќавања за тврдењата од неодамнешната биографија на Камерон дека многу сакал да игра тенис и да се „разладува“. (Телеграф)
|
