Сменето името на изложбата во Белгија

СОФИЈА – Насловот на изложбата што ќе биде презентирана во Кралскиот музеј Маримонт во Брисел ќе биде сменет и ќе гласи „Словенски ракописи од Македонија XIII-XIX век“, тврдат бугарските медиуми. Според нив ова го најавил европарламентарецот Андреј Ковачев, кој го оркестрираше притисокот во музејот да се смени „научно некоректното“ име на изложбата составена од средновековни пишани документи од Македонија.

Претходно, името со кое требаше да се претстави изложбата, за првпат од ваков тип надвор од границите на Македонија, беше „Илјада години писмена традиција во Македо��ија“, па ако се точни бугарските најави, не е јасно во што е промената, бидејќи останува суштината.

Иако изложбата ќе биде отворена на 9 октомври, на интернет страницата на Кралскиот музеј се' уште нема најава за неа, веројатно од претпазливост на организаторите да не се соочат со уште некои незадоволни соседи на нашата држава.

„Работите околу изложбата се смирија. Веќе ги имам имињата на научниците од Католичкиот универзитет во Левен кои учествуваа во анализата на ракописите. Ќе ја посетам изложбата и ќе биде интересно да видам како тие ќе ги претстават ракописите. Бидејќи за словенските ракописи се знае дека се бугарски или српски, секако не грчки, бидејќи Грците не се Словени, а за територијата што ја зазема денешна Македонија во периодот од XIII-XIX век можеме да зборуваме само за бугарски или српски ракописи“, нагласил Ковачев за бугарски „Фокус“. Според неговите оценки, мнозинство од ракописите се бугарски. (Н.Р.)