28.09.2012, 10:14 ОМД побара од ОН да ја спроведат пресудата од Хаг
Обединетата македонска дијаспора (ОМД) го поздрави усвојувањето декларација за почитување на владеењето на правото на 67. Генерално собрание на Обединетите нации во Њујорк и бара Светската организација да ја имплементира пресудата од Хаг.
- Ние како Македонци кои живееме во САД, во држава во која законите се почитуваат, многу сме задоволни што Обединетите нации донесоа декларација за спроведувањето на законите. Пресудата од Хаг е еден судски документ, кој покажува дека Македонија навистина е оштетена страна во овој спор, и се надеваме дека ОН ќе се покажат и на дело, и дека ќе ја имплементираат оваа пресуда, со што ќе се дозволи Македонија да биде членка на ОН под нашето уставно име, изјави Александар Митрески од ОМД по средбата со претседателот Иванов во Њујорк, јави дописникот на МИА.
Обединетата македонска дијаспора со седиште во Вашингтон работи на информирање на американските власти за состојбата со правата на Македонците во светот, како и за промовирање на македонските интереси.
Мето Колоски, претседателот на ОМД, по средбата најави дека во октомври во Вашингтон, и во други градови во САД и во Канада ќе се организира презентација за кршењето на правата на Македонците во Грција од страна на Евгенија Нацулиду, претставник на ОМД за Грција.
|
