Иванов настапил како лидер на велесила

Повисок тон во ОН не се очекува од лидер на демократска држава - е една од оцените за говорот на претседателот Ѓорге Иванов

Слободанка Јовановска


Говорот на претседателот Ѓорге Иванов, освен грчкиот шеф на дипломатијата, не испровоцира никакви реакции дома, иако според општа оцена, беше наменет токму за домашна публика и за Атина. За него молчеа сите политички партии, а аналитичарот Жидас Даскаловски не сакаше да го коментира бидејќи, како што рече, не го слушал и не знае што содржи. Оние што, сепак, го слушале, оценуваа дека претседателот имал говор што не соодветствува со реалноста.

„Не би рекол дека е тоа говор за 19 век, како што го оцени грчкиот шеф на дипломатијата. Напротив, би рекол говор за 22 век, т.е. за некоја идна утопистичка ситуација“, оцени професор Денко Малески, со забелешка дека тој нема да смени ништо бидејќи во него, како и во говорите на премиерот, провејува култура на мачеништво и на неправди што ни се нанесуваат, кои поминуваат добро дома, но надвор немаат ефект. „Нам ни треба култура на соочување со реалноста и на одважни чекори за решавање на проблемите“, оцени Малески додавајќи дека претседателот бил доследен, сепак, односно на линијата на политиката што ја води.

За Ивон Величковски од ЛП говорот е реален одраз на погрешните приоритети и методи на нашата надворешна политика. „Имаме осцилации - еднаш бараме решавање на спорот политички, еднаш правно, и губиме време во потрага по концепт место да го решаваме проблемот“, вели Величковски на кого му пречи и злоупотребата на генералниот секретар Бан Ки-мун, бидејќи цитирајќи го претседателот, пратил порака до Атина дека „тој е со нас“.

„Мафтање со говори како што го прави Махмуд Ахманидеџат, или како што го правеше Никита Хрушчок, кој удираше со чевел на говорницата, или Ахмед Секу Туре кој го покриваше микрофонот со бела капа, не се очекува од лидер на демократска земја“, смета професорот Нано Ружин. Ја разбирам фрустрацијата на претседателот, но така не се настапува во ОН“, вели Ружин, додавајќи дека тоа особено не се прави истиот ден кога премиерот Никола Груевски побара продолжување на преговорите со Грција, па и со помека варијанта - прво да почнеме со некои други прашања, па да стигнеме до најтешкото.

Стево Пендаровски, професор, исто така смета дека претседателот годинава е доследен на тезите што ги застапува на кој било меѓународен форум, а тоа е дека светот треба да ја препознае новата политичка реалност - Хашката пресуда. Според него, ниту еден релевантен меѓународен фактор не смета дека таа е добра подлога само со неа да се реши спорот околу името, па ако сакаат да го решат, треба да ја заборават. Тонот на обраќање, пак, на претседателот го оцени како прилично офанзивен, но и карактеристичен за него кога се обраќа надвор.

„Тој тон беше непотребно офанзивен и патриотски. Во ОН не се продава патриотизам“, оцени Пендаровски со забелешка дека Иванов настапил од позиција на велесила, па и со тонот и со пораките беше дисконектиран од политичката реалност.