Уапсен авторот на „Невиноста на муслиманите“

Накула Бесли Накула, автор на контроверзниот филм „Невиност на муслиманите“, беше уапсен во САД бидејќи ја прекрши условната казна. Имено, овој контроверзен режисер беше на условна слобода откако во 2010 година беше осуден за измама со кредитни картички и лажно претставување. Беше осуден на 21 месец затвор, а потоа пуштен на условна слобода со забрана за користење компјутери и интернет.

Во моментот кога Накула го објави „трејлерот“ за својот контроверзен филм „Невиност на муслиманите“, тој ја прекрши условната казна. Покрај тоа, Накула прекрши уште осум ставки од условната казна, а една од нив е лажење службено лице, задолжено за надгледување на Накула додека е на условна слобода.

Неговиот адвокат изјави за медиумите дека одењето во затвор на неговиот клиент, всушност, за него претставува „смртна опасност“, бидејќи во затворите има многу затвореници од исламска вероисповед.

По апсењето, Накула се појави во судницата на Лос Анџелес, облечен во куси панталони и кошула, а медиумите пишуваат дека во текот на сослушувањето се смеел.

Филмот „Невиност на муслиманите“ предизвика жестоки реакции на Блискиот Исток, во Северна Африка и во Шри Ланка. Американскиот амбасадор Крис Стивенс и уште тројца Американци беа убиени во конзулатот во Бенгази. Речиси стотина луѓе загинаа во протестите во седум држави.