30.09.2012, 17:44 Грција го негира убиството на Самарџиев
„Не постои ваков случај. Ова е дел од нечија морбидна фантазија“, велат од Министерството за надворешни работи во Атина
Од нашиот дописник
Миркица Поповиќ
АТИНА - Нема никаква официјална потврда за смрт на студент (со име Александар Самарџиев) во Солун. Од грчката полиција одговорна за цела северна Грција велат дека немаат ваков случај, а истиот одговор го даваат и од солунските болници. Случајот го демантираат и од грчкото Министерство за надворешни работи. Информацијата која проструи низ медиумите и предизвика голема вознемиреност во јавноста беше преземена од профилот на „Фејсбук“ на Стилјан Самарџиев. Тој во петокот извести дека неговиот братучед Александар, наводно, студент во Солун, во петокот бил претепан од припадници на Златна зора во Солун, а во саботата попладне подлегнал на повредите и починал.
Од полицијата велат дека се во контакт со сите солунски болници и дека нема никакви податоци за ваков случај. Потенцираат дека процедурата е добро позната и доколку во болница биде пријавен некој со сериозни повреди од физичка пресметка, персоналот веднаш контактира со полицијата. Истиот одговор го даваат и од солунските болници кои биле дежурни во петокот и саботата и во чии листи нема пациент со името Самарџиев, ниту, пак, случај кој одговара на она што го тврди Стилјан. Реакција пристигна и од грчкото Министерство за надворешни работи.
„Не постои ваков случај. Ова е дел од нечија морбидна фантазија. Ја повикуваме владата на Поранешната Југословенска Република Македонија да биде попретпазлива и да не остави простор да се негува вештачко заострување и национализам“, истакна портпаролот Григорис Делавекурас.
Освен тврдењето на Стилјан, во јавноста не се појави ниту некој од неговото семејство, ниту, пак, родителите на момчето за кое се тврди дека починало во болницата во Солун да ја потврди оваа информација, што предизвика сомневање и дали воопшто постои Александар Самарџиев или со грчко презиме Самарѕис. Од овие причини, некои од здруженијата и специјалните претставници, кои се борат и ги следат случаите за правата на Македонците во Грција, пристапуваат со големо сомневање кон настанот. Запознаени со тоа како функционира грчката држава, потврдуваат дека не е возможно да има случај на лице со сериозни повреди, особено од физичка пресметка со Златна зора, со кој нема веднаш да биде запознаена полицијата, а властите, пак, во тој случај немало да молчат, туку веднаш ќе побарале одговорност.
Неофицијално, од партија��а Виножито се дознава дека постои зачуденост и сомнеж за вистинитоста на овој случај, особено затоа што добиле одговор дека ниту родителите на Стилјан не се информирани за овој случај ниту, пак, жителите на селата во Леринско и во Воденско од каде што се тврди дека е Александар Самарџиев не се запознаени оти имало ваков инцидент. Дополнително сомневање се создава и од тоа што досега никој не слушнал Стилјан да говори дека има братучед кој заедно со него се „бори за правата на Македонците“. Од прес-канцеларијата на партијата Златна зора изјавија за „Утрински“ дека не сакаат да даваат изјави за овој случај. Неофицијално се дознава дека од македонскиот конзулат, веднаш по лиферувањето на информацијата, побарале информации и од полицијата и од болниците во Солун, но го добиле истиот одговор: нема ваков случај.
Стилјан Самарџиев тврдеше дека припадници на неонацистичката „Златна зора“ физички го нападнале неговиот братучед поради тоа што дознале за нивната роднинска врска, како и поради тоа што Александар не сакал да го промени македонското презиме. Оние што се запознаени со активностите на Стилјан Самарџиев го оценуваат како личност со националистички ставови, кој повремено предизвикува проблеми и нема поврзаност со активностите на здруженијата на Македонци во Грција. Ги ставаат под прашалник и неговите тврдења дека бил уапсен и физички нападнат од полицијата пред неколку месеци кога го поставил македонското знаме пред канцелариите на грчката полиција во Солун.
Во Грција, откако се крена прашина за случајот Самарџиев, оцените беа дека не е возможно да има ваков случај и да биде скриен од грчките медиуми, кои постојано ги имаат на удар десничарите од Златна зора.
|
