Еврокомесарот го објаснуваше твитот за новодното убиство



Атина - Грчките новинари покажаа интерес и за твитот на еврокомесарот поврзан со случајот за наводното убиство на етнички Македонец од Грција во Солун од страна на припадници на грчката екстремистичка партија Златна зора. Појаснувајќи го твитот во кој изрази загриженост од инцидентот и побара да се покаже смиреност за да не се влошат односите и да се направи целосна истрага, Филе потенцираше дека целта не му била да ја зголеми еуфоријата која беше предизвикана од овој случај кој започна и се развиваше на социјалните медиуми. „Причината беше да се повика на смиреност и целосна истрага на фактите“, потенцираше Филе во одговор на грчките новинари. Еврокомесарот веднаш на социјалната мрежа Твитер и добил одговор од потпаролот на грчкото министерство за надворешни кој вели дека инцидентот воопшто не се случил и дека требало Филе да се консултира со грчкото министерство пред да го напише твитот.

Од грчкото министерство за надворешни останува официјалната реакција од неделата дека ваков инцидент не се случил и е дел од нечија морбидна фантазија. Во реакцијата се побара од македонската влада да биде попретпазлива и да не негува вештачко заострување и пораст на национализмот.

Изјавата на потпаролот на македонската влада беше и она што предизвика најголема зачуденост кај одредени грчките новинари кои започнаа да го следат случајот Самарџиев. Беше оценето дека изјавата не била доволно претпазлива и не повикувала на целосно смирување на ситуацијата, туку оставила простор да се верува дополнително во непотврдената информација за убиство, што се сметаше дека не помага за тоа да се намали тензијата во билатералните односи.

Дел од медиумите и блогови се заинтересираа за случајот Самарџиев. Дел од нив само ја пренесоа информацијата од грчкото министерство за надворешни работи, други забележаа дека се работи за низок удар од македонска страна, а одредени блогови ја истражија и биографијата и активностите на Стилијан Самарџиев кој со својот Фејсбук статус предизвика внимание во јавноста за наводно физички напад и убиство на неговиот братучед во Солун од Златна зора. Случајот предизвика интерес кај грчките новинари кои паралелно со македонските го истражуваа случајот. Од болницата Папаниколау за која се тврдеше дека е местото каде бил однесен повредениот тврдат дека ваков случај од петокот наваму не е примен во болницата, а од полицијата во Солун и одредот за Северна Грција тврдат дека немаат ваков случај. (М.П.)