ЕДИТОРИЈАЛ

Падот на медиумскиот таjкун

Нина Нинеска-Фиданоска

Се случи она што сите некако тивко и со резерва го шушкаа од поодамна, дека медиумскиот бос Велија Рамковски овој пат нема да куртули од апсење и дека е само прашање на време кога ќе биде приведен. По црни ноќи полицијата дојде по Рамковски во неговата телевизија, каде што тој, веројатно свесен дека многу скоро ќе мора да се соочи со лисици на рацете, сакаше уште еднаш да зборува пред нацијата. Таа шанса овој пат не му беше дадена.

Веста за апсењето, во истиот момент кога беше пласирана во етерот, со фантастична брзина ги засени, буквално ги направи минорни сите други случувања во земјава. Досега недопирливиот Рамковски, неприкосновен магнат во медиумскиот, трговскиот, но и во редица други бизниси, сега ќе мора да се соочи со лицето на правдата. Со него повлече и една дузина негови луѓе од доверба, кои, исто така, се осомничени дека правеле малверзации и дека затајувале даноци.

Сите оние што беа подготвени рака да дадат дека „помалиот и поголемиот газда“ повторно ќе успеат да најдат заеднички јазик, што во превод би значело дека едниот сериозно ќе омекне во критиките, а другиот малку ќе ги подзаборави вреќите со кеш, сега убедливо се демантирани. Никола Груевски покажа дека решил да оди до крај во случајот со Рамковски, поточно во расчистување на криминалот за кој истражните органи тврдат дека тој го правел.

Имаше ли шанса македонскиот медиумски тајкун, за кого одредени кругови тврдеа дека е посилен од сите влади и од сите премиери што сме ги имале досега, да го избегне ваквиот епилог? Изгледа дека власта веќе не сакаше да слушне за никаков нов обид за „пазарење“ со него, независно што Велија по првичниот афект малку се освести и замавта со белото знаменце, објаснувајќи дека буџетски кеш за реклами немало, а дека тие во телевизијата малку претерале... Можеби затоа Рамковски возврати со уште посилен контранапад, одејќи од град до град, од село до село, од тутунари до резигнирани албански политичари, во некој чуден обид сите нив да ги анимира и да ги крене на нозе во сеопшт бунт спрема режимот на Груевски. Веќе стана сосема извесно како ќе ескалира целиот тој негативен набој.

Од институциите на државата сега очекуваме целосна и брза разврска на оваа афера и расчистување и со последното атомче сомнеж околу сите дубари и матни бизниси за кои се осомничени Рамковски, неговото семејство и неговите главни бизнис-играчи. Сите ние, и како граѓани и како медиуми, кои досега до денар чесно и уредно сме ги плаќале давачките кон државата, бараме да бидат санкционирани тие што се огрешиле од законот. Иако малку подобро ќе се чувствуваме доколку оваа акција се случеше пред две или три години, кога Велија и' беше по мерка на Владата. Тогаш без резерва ќе бевме убедени дека намерите за борба со криминалот се искрени и никако поинакви.

Во целиот овој случај многу боли фактот што најголемите жртви на криминалот на газдата сега ќе бидат новинарите во телевизијата, која стои пред многу неизвесна иднина. Тоа особено важи за професионалците кои досега легално си го заработуваа лебот во А1. Тие мора да бидат заштитени, во име на демократијата. Но, пресметката со криминалот никако не смее да прекине, напротив, таа мора да продолжи со истото силно темпо со кое започна. Во име на правната држава.