Сефер ќе стоел настрана од медиумскиот бизнис на Рамковски

Информациите дека Цаноски ќе го преземе менторството врз А1 за синот на пратеникот се шпекулации

Горан Адамовски


Генералниот менаџер на ФОН и син на пратеникот Фијат Цаноски, Сефер Цаноски, ги нарече шпекулации информациите дека семејството Цаноски ќе го преземе менторството врз А1 телевизија по апсењето на сопственикот Велија Рамковски.

Во изјава за нашиот весник, Сефер Цаноски, кој му е зет од ќерка на Рамковски, тврди дека нивната грижа и натаму е ФОН и ништо друго. „Најнапред, да укажам дека Велија Рамковски не е осуден, така што тој останува сопственик на телевизијата. Не се точни ниту муабетите дека нашето семејство ќе се грижи за вработените во А1, во смисла да им исплаќаме плати и слично“, уверува Цаноски. Според него, семејниот бизнис што го имаат сега не им дозволува влез и на други места, односно во други дејности.

Според одредени шпекулации, пак, што можеа деновиве да се слушнат меѓу вработените во телевизијата, платата за ноември, односно сумата на која се пријавени, ќе им била исплатена до крајот на годината, а наводно, за пари ќе се погрижел Цаноски.

Главниот уредник на А1, Младен Чадиковски, во вчерашната изјава за „Утрински“ не сакаше да ги коментира овие шпекулации.

Одделни аналитичари, кои бараат да останат анонимни, не ја исклучуваат можноста телевизијата да биде понудена на продажба, се разбира, доколку се најде сериозен инвеститор што би можел да ја плати соодветната цена за етаблиран медиумски бренд на македонскиот пазар, како што е А1. Сепак, ваквите можности засега остануваат целосно во зоната на шпекулациите.

Во меѓувреме, Кривичниот совет на Основниот суд Скопје 1 ги одби жалбите на тројцата осомничени во акцијата „Пајажина“, на кои им е одреден едномесечен притвор. Поранешниот и сегашниот директор на А1, како и управителот на „Време ЕЧ“ и печатницата „Мисирков“ остануваат во затворот „Шутка“. Адвокатите поднесоа жалби единствено за овие тројца осомничени, додека за останатите решија да не се жалат на одлуката на истражниот судија, со објаснување дека и онака не би била донесена објективна и законска одлука, а со жалбите само ќе стагнирала истрагата.

Како што дознаваме, на сите 14 притворени во оваа афера вчераутро им бил извршен лекарски преглед, кој покажал дека тие биле во добра психофизичка состојба. По нивниот влез во затворот во Шутка, бил направен план и распоред кој со кого ќе ја дели ќелијата.

„Ставени се во простории за двајца или тројца, а многу мал дел од нив престојуваат во ќелија за четворица“, велат нашите извори од Министерството за правда.

Во Министерството за внатрешни работи, пак, и натаму трагаат по синот на Рамковски, Хеди, кому во отсуство му беше одреден притвор од 30 дена. Се проверуваат станови, за кои постои сомневање дека се криел.

Вкупно 23 лица се осомничени во акцијата „Пајажина“, во која надлежните разоткривале криминал во фирми поврзани со Рамковски, кој според нив бил тежок неколку милиони евра. Притоа, овие фирми избегнале да платат данок во висина од четири милиони евра. Пријави заработија и десет фирми на „Перо Наков“. Како што соопшти МВР, тие ќе одговараат за злосторничко здружување, даночно затајување, перење пари, злоупотреба на службена положба и овластување, оштетување или повластување на доверители, повреда на правата од индустриска сопственост и неовластена употреба на туѓа фирма, како и спречување на докажување во периодот од 2006 до 2010 година. (Г.А.)