Поглед

Куполи за пратениците

Оливера Војновска

Собраниските куполи најавени уште од претходниот парламентарен состав сигурно ќе се градат. Во годината што ни доаѓа тие ќе надвиснат над реновираната собраниската зграда. Така барем уверуваат од Собранието. Што значи нема простор за загриженост и граѓаните ќе може да здивнат: пратениците ќе ги добијат сите три куполи во комбинација на метал и стакло во кружни форми. Едната ќе биде огромна - централна, а двете помали ќе бидат поставени на ќошињата и ќе гледаат кон паркот „Жена-борец“.

На пензионерите кои таму играат шах и табла погледот ќе им оди право на куполите. И не само кон куполите. Гледајќи кон централниот влез на Собранието, во видното поле ќе им влезе претседателот на Крушевската Република, Никола Карев, качен на коњ. Паркот „Жена -борец“, пак, за скопјани ќе стане посебно место за уживање и за историско просветлување. Таму ќе бидат поставени: спомениците на паднатите херои за Македонија, Президиумот на АСНОМ и на основачите на ВМРО. Но, тоа не е се'. Низ триумфалната порта во правец на култната „Ванила“, здивот ќе им застане на преродениот плоштад, на фасадите во барок, романтизам, неокласицизам... В очи ќе им залетне и некој друг ситен или покрупен детаљ од измешаните стилови, кои му го сменија личниот опис на јадрото на Скопје.

И потоа онака духовно и културно преродени ќе може да му се вратат на директниот собраниски пренос. А, таму во пленарната сала ќе ги видат истите познати лица. Половината ќе молчат и ќе гласаат. Половината ќе врескаат и ќе се расправаат меѓу себе. Само, сега ќе изгледаат многу, многу позадоволни. Бидејќи бараа канцеларии - нели тоа беше проблем зашто најголемиот дел уста не отвораат, а гратис добија и куполи. Изгледа, само уште куполи им недостигаа за задоволството да биде комплетно!