Не се брза со „Надеж“ и „Партиски реклами“

Шврговски им дал упатство на обвинителите добро да ги проучат овие предмети

Гордана Дувњак


Обвинителството се' уште ги проучува аферите „Надеж“ и „Партиски реклами“, кои, како што велат, поради сложеноста и обемноста, се оставени за после новогодишните празници. Државниот јавен обвинител, Љупчо Шврговски, вчера ни потврди дека им дал усно упатство на своите колеги да не брзаат со реферирањето на овие предмети, односно се' додека добро не ги проучат.

Случајот „Надеж“, кој се однесува на наводна злоупотреба на службената должност на ексшефот на државата, Бранко Црвенковски, е во рацете на посебното Обвинителство за организиран криминал. А, со тврдењата, пак, на сега притворениот сопственик на А1, Велија Рамковски, кој ја обвини Владата за злоупотреби во плаќањето на партиски реклами на ВМРО-ДПМНЕ со буџетски пари, се занимава скопското Обвинителство.

Првиот човек на Обвинителството за организиран криминал, Јован Илиевски, во изјавата за „Утрински весник“ вели дека добиле дел од документацијата за „Надеж“ од Антикорупциска комисија.

„Документите не ни се доволни и затоа побаравме од Кабинетот  на експретседателот на државата да ни ги достават дополнително договорите со словенечките експерти, начинот на кој е извршено плаќањето“, нагласува Илиевски. На прашањето дали зеле изјава од Црвенковски и од неговите најблиски соработници, тој одговара дека во оваа фаза тоа не е потребно и, главно, се потпираат на договорот и на документите.

Во Кабинетот на лидерот на СДСМ и поранешен шеф на државата, Бранко Црвенковски, се изненадени од ваквите информации.

„Прв пат слушам од вас за вакво нешто. Ниту некој побарал од нас некакви документи ниту, пак, писмено се обратил за да му доставиме. Ние веќе се изјаснивме дека ќе бидеме конструктивни и ќе соработуваме за се' што ќе биде побарано од нас“, ни рече шефицата на Кабинетот, Наташа Савова.

Се' уште не е оформен предмет во скопското Обвинителство ниту околу аферата со партиските реклами. Според скопскиот обвинител, Марко Зврлевски, случајот е во преткривична постапка и „работиме на конципирањето на предмет“.

Аферата „Надеж“ пред повеќе од еден месец ја отвори владејачката ВМРО-ДПМНЕ, кога го обвини актуелниот опозициски лидер дека ненаменски потрошил 340.000 евра пари од граѓаните за плаќање консултантски услуги на тројца словенечки експерти. За случајот се заинтересира и Антикорупциска комисија, која заклучи дека експретседателот ја злоупотребил службената положба и го прекршил Законот за јавни набавки ангажирајќи словенечки ПР-експерти со државни пари без објавување јавен тендер.

Според антикорупционерите, Црвенковски морал да распише јавен оглас, бидејќи во државата и во регионот има повеќе консултантски куќи, кои даваат исти услуги, кои тој ги добил од словенечките експерти за повеќе од 340 илјади евра. За нив е нејасно кој е критериумот по кој Црвенковски ги избрал Верчич, Ашанин и Гутеша и врз основа на чија процена е формирана цената за изработка на стратегијата. Покрај Црвенковски, Антикорупциската комисија бара кривични пријави и за членовите на неговиот Кабинет.

Што се однесува до аферата со партиските реклами, неа ја проблематизираше Рамковски во моментот кога финансиските инспектори ги тресеа фирмите на „Перо Наков“ б.б. Во едно од интервјуата на неговата телевизија, тој го обвини лично премиерот Никола Груевски дека по негов налог се плаќани партиските реклами во милионски износи со владини пари. (Г.Д.)