ОН се поправи за јазикот, и тоа двапати

Јазикот се врати во ОН прво со референцата, а потоа како „македонски“

Тамара Грнчароска



Обединетите нации се премислија и ни го вратија јазикот во регистарот, и тоа не еднаш, туку двапати за помалку од 24 часа. По реакцијата од МНР до генералниот секретар Бан Ки Мун, вчеравечер по македонско време во личната карта на нашата земја во графата јазик беше запишано повторно „македонски“, но со додавка (поранешна југословенска Република Македонија), за да неколку часа подоцна, т.е. веќе денеска стои само „македонски“. Вчера портпаролката на ОН не знаеше да одговори на прашањето што се случува со „јазикот“ на Македонија и не остави без официјален одговор , со „ветување“ дека ќе провери, па ќе одговори.

Од МНР информираа дека по враќањето на македонскиот јазик со референцата повторно интервенирале, барајќи да се врати првичната состојба. Реагирањето се одвивало преку нашата постојана мисија во ОН, чиј шеф е Слободан Ташовски, кој по исчезнувањето на придавката „македонски“, испратил дипломатска нота до генералниот секретар на ОН, со информација за интернет-страницата на УНТЕРМ и со барање - таа да се врати на поранешната состојба. Од кабинетот на генералниот секретар било ветено дека ќе видат во што е проблемот и дека ќе ја следат инструкцијата да се врати поранешната состојба во графата.

Нашите претставници во ОН, исто така, го контактирале и терминолошкиот тим од секцијата за термини и референци и управата за документација, при што побарале објаснување зошто е избришана дескрипцијата на јазикот. Оттаму добиле информација дека станува збор за техничка грешка и дека ќе се направеле потребните корекции.

Бришењето, па враќањето на македонскиот јазик во меѓународните институции не е прв ваков случај. Веќе неколку пати досега се менувани термините со кои се означува нацијата и јазикот што се говори во земјава, именувана под референцата. Па така во самите организации постои неконзистентност и конфузија по ова прашање. На пример во ОН, во листата со англиските имиња на земјите и на јазикот стои само референцата „поранешна југословенска Република Македонија“, исто и во делот на руски јазик, додека на истата страница во истата графа на француски и на шпански јазик освен референцата, стои и „Македонци“.