Тренд

Растат штедните влогови

Годинава штедењето постојано бележи нагорен тренд. Банките се борат за секој денар на граѓаните и како да се натпреваруваат која повеќе ќе ги зголеми каматите за депозитите. Моментно годишните камати за денарската заштеда се искачија до рекордни над 10 проценти, а за штедењето во евра се движи околу 5 отсто.

Според податоците на Народна банка на Македонија, вкупните депозити и на граѓаните и на фирмите изнесуваат 3,3 милијарди евра, од нив само на граѓаните се 2,3 милијарди евра, а на заштедите на фирмите отпаѓаат една милијарда евра.

„Каматните стапки на депозитите го достигнаа своето највисоко ниво во почетокот на 2009 година, а оваа година пасивните каматни стапки на кредитите паралелно со промените на активните имаат тенденција на намалување. Кај депозитите се најзастапени орочувањата на 1 година, со тенденции за зголемување на долгорочното штедење“, велат од Комерцијална банка.

Депозитите се базата за успешно работење на една банка, велат од Стопанска банка. „Имаме над 50 различни депозити за население по рочност, валута, начин на добивање на каматата, можност за докапитализација, флексибилност во уплата и исплата на средства“, објаснуваат од Стопанска банка.

Каматите на депозитите можеби при намалувањето не ја следат динамиката на намалување на каматните стапки на кредитите, но, сепак, и тие се намалени, велат од НЛБ Тутунска банка. „Поради повисоките каматни стапки, граѓаните се' повеќе се решаваат да штедат на подолги рокови и исто така во денари. Кај нас моментално особено актуелен е супердепозитот“, велат оваа банка.

„Во однос на депозитите, во Охридска банка најинтересен е депозитот прогрес во евра и во денари за население. Тој е со растечка каматна стапка на полугодишно и квартално ниво со можност за целосно предвремено повлекување на депозитот и исплата на камата важечка за последниот период на достасување“, објаснуваат од Охридска банка. (С.М.)

Камати

депозити во денари депозити во евра

Комерцијална банка највисока 10,5 5,10

Стопанска банка највисока 10,4 5,4

НЛБ Тутунска банка највисока 10,3 5,2

Шпаркасе банка највисока 10,5 5,4

Охридска банка највисока 7,25 6

(во %, на годишно ниво)