Личните карти како пасоши за влез во Србија

Србија ќе биде првата земја во која македонските граѓани ќе можат да влегуваат само со лична карта, односно без пасош. Официјален Белград, при завчерашната посета на српскиот министер за внатрешни работи, Ивица Дачиќ, побара граѓаните од двете земји да можат слободно да ги минуваат границите, покажувајќи единствено лични карти. Нашата министерка, Гордана Јанкулоска, која беше домаќинка на средбата, смета дека идејата е добра, а по рaзговорот со премиерот Никола Груевски, ќе се бара модус за реализација.

„Србија сака поскоро земјите од поранешна Југославија, пред да влезат во Европската унија, да направат заедничка територија каде што луѓето ќе можат да патуваат само со лични карти. Македонија и Србија веќе потпишаа договор за граѓаните од ЕУ да можат тука да влезат само со лични карти. Тогаш зошто само тие да можат, кога ние тука сме соседи. Податоците покажуваат дека годинава 3,5 милиони српски граѓани ја преминале заедничката граница“, рече Дачиќ.

Србија веќе има потпишано таков договор со Црна Гора и со БиХ, а се преземаат мерки тоа да биде направени и со Македонија и со Хрватска. Македонија, пак, само со лични карти во земјава пушта државјани на ЕУ. Првиот чекор во реализацијата на иницијативата од Белград е потпишувањето договор меѓу Македонија и Србија, според кој, граѓаните што живеат до 30 километри од границата, во двете земји ќе можат да минуваат само со лични карти. „Тоа беше едно од клучните барања на локалното население“, изјави Јанкулоска.

Граѓанското движење „Разбуди се“ вчера се огласи со реакција за изјавата на српскиот министер, кој при посетата на Скопје рече дека го смета Косово како составен дел од Србија. Незадоволни се и од тоа што Јанкулоска ја премолчела оваа изјава, особено што Македонија веќе воспостави дипломатски односи со официјална Приштина. Околу иницијативата на Дачиќ за минување граница со лични карти, од „Разбуди се“ сметаат дека приоритет на Македонија било да воспостави такви договори со Албанија и со Косово, пред се', поради роднинските врски на Албанците и трговската размена. (Г.А.)