Од ниви се краде грав и компири

ТЕТОВО - Земјоделци од селата Теново, Стенче, Волковија се жалат дека непознати крадци го собрале гравот од нивните ниви. Но, се краделе и други земјоделски култури, пиперки, домати, тикви, компири... Се претпоставува дека кражбите се случуваат поради голема сиромаштија, а можно е украдените производи да се носат на пазарите и да се продаваат.

„Време е за берба на грав. Сега се собира прва рака, која е најквалитетна и најголема. Ги користиме деновите на викендот и другото слободно време во денот да го собереме гравот. Кога отидовме на нива, имаше што да видиме. Само првите два реда од страната кај што има видик, гравот не беше собран. Внатре се' беше празно“, ни се пожали еден жител од Теново.

„Се чудам како може така слободно да се влезе во туѓа нива и цел ден да се помине во берба на грав, а потоа без срам да се изнесат полни вреќи сосе мешунки. Во овие денови на веќе созреан грав, нивите ни остануваат празни. Гравот има висока цена, особено новиот што го берат крадците. Не дај боже да затекнам некого во нива. Се плашам дека ќе ја затворам куќата. Работам цело лето, а сега наместо јас да го соберам плодот, тоа го прави некој друг“, револтирано вели жител на Волковија. (Г.Е.)