Казни за некористење на училишните компјутери

Инспекторите од денеска ќе излезат на терен и ќе проверуваат каде не функционираат компјутерите

Жаклина Хаџи-Зафирова

Три илјади евра е највисоката казна што ќе мора да ја плати училиштето каде што не се користат компјутери во наставата, а со илјада евра ќе биде казнет наставникот што нема да ја реализира електронски наставата. Со вакви драконски казни ќе се соочат оние училишта во државава каде што ќе се утврди дека не функционира проектот „Компјутер за секое дете“ откако пред две недели беа донесени законските измени за задолжително користење компјутери во наставата.

Десет екипи на Државниот просветен инспекторат од денеска ќе излезат на терен и ќе ги посетуваат сите средни училишта во државава за да проверат каде не функционираат компјутерите. По скенирањето на средните училишта, ќе се проверуваат и основните. Од Инспекторатот најавуваат дека ќе фрчат и тужби за оние училишта каде што нема надомест за оштетените компјутери за кои ќе треба да платат учениците.

Екипите ќе бидат составени од инспектори од Министерството за образование и експерти од Министерството за информатичко општество.

„Ќе видиме каде има проблеми во изведувањето настава на компјутери. Ако има проблем во инсталирањето, ќе видиме како можеме да помогнеме за да се вклучат компјутерите. Доколку нема таков проблем, директорите ќе ја понесат ��дговорноста ако не се употребуваат компјутерите“, објаснува Арсов. Според него, по поднесувањето на кривичните пријави за оштетувањата на компјутерите во училиштата, значително се намалени штетите, но се' уште сумата за оштетените компјутери е голема и изнесува околу 30 милиони денари. Директорот на Инспект��ратот се жали дека училишните одбори не барале одговорност од директорите за направените штети, па затоа сега Министерството ќе ги тужи конкретно училиштата кои ќе мора да платат за штетите.

Моментно голем број училишта се соочуваат со тешкотии околу инсталирањето на компјутерите што ги нема секаде, а има и такви училишта каде што штетите се огромни и никој се' уште не ги надоместил. Ваквата хаотична ситуација, сепак, не постои за надлежните, кои тврдат дека компјутерите се употребуваат речиси секаде, а најмалку во 60 отсто од училиштата.

Најскандалозен е можеби примерот со скопското Основно училиште „26 Јули“ каде што никој од ресорните министерства за образование и за информатичко општество две години не дошол за да праша зошто не им се инсталирани компјутерите. Надлежните се заинтересираа за овој случај дури откако медиумите известија за тоа.

Проблем во оние училишта каде што компјутерите се инсталирани и функционираат е тоа што учениците, пак, повеќе ги користат за Интернет и да се „закачат“ на „Фејсбук“ отколку што ги употребуваат за да ја следат наставата. Има и такви училишта каде што има огромни штети, а тие се' уште не се надоместени, па компјутерите повеќе им пречат отколку што им користат на учениците.

Сега, дополнителен проблем за училиштата е пристигнувањето на лаптоп-компјутерите што се наменети за основците од прво до трето одделение, бидејќи и тие чекаат да бидат инсталирани.

Директорите на неколку скопски училишта велат дека биле известени од Министерството за информатичко општество оти треба да почекаат на софтверот за да може да профункционираат. Во меѓувреме, за да не пречат и тие како и компјутерите од претходниот проект, се складираат во училишните магацини.

Пратеничката на СДСМ Маринела Тушева вели дека компјутерите се нефункционални, а дека цената за тоа што не се употребуваат ја понесуваат наставниците. „Наставниците не знаат од која страна да се бранат. Постојано им се закануваат, а сега и со драконски казни за неупотреба на компјутерите“, изјави Тушева.