Подобро градоначалник отколку премиер

Жителите на Струмица и на Карпош не треба да стравуваат дека по парламентарните избори ќе останат без градоначалник

Александра М. Митевска


Зоран Заев и Стевчо Јакимовски, двајца од неколкутемина опозициски градоначалници, кои високо фигурираат и во сдсмовската хиерархија, не ја сонуваат премиерската фотелја. Иако во медиумите нивните имиња на големо се споменуваат како можни опции на СДСМ за кандидати за премиер на следните парламентарни избори, тие велат дека нивните амбиции засега не ги надминуваат границите на општините со кои раководат. Токму Заев и Јакимовски во последно време се главна цел на власта, која прво се занимаваше со богатството на Заеви, а сега ја експлатира темата „Галеб“.

Заев, кој веќе петта година (во два мандата) е на чело на Струмица, тврди дека негова најголема желба е по завршувањето на градоначалничкиот мандат да остане во родниот град. „Би сакал да се вратам во фирмата ’Еленица’ и да ги водам комерцијални��е работи на фирмите на Заеви. Таму работев како комерцијален директор и пред да почнам поактивно да се занимавам со политика. Но, претходно мора да ја поразиме ВМРО-ДПМНЕ. Тоа е мојот сон“, ни изјави Заев. Тој појаснува дека како потпретседател на СДСМ е политички изграден кадар и дека, веројатно, поради тоа, неговото име се врти во јавноста како потенцијален кандидат за мандатар за состав на некоја идна влада. Но, објаснува тој, ниту ми е понудено такво нешто, ниту сум размислувал на таа тема, ниту го посакувам тоа, јас останувам во Струмица. Според него, во СДСМ воопшто не се разговарало околу тоа кој би бил кандидат за премиер, бидејќи до редовниот термин за избори - кон средината на 2012, има уште многу време. Како што вели, тоа е тема што ја наметнува владејачката партија, со цел да се создаде лажна претстава за фракционерска битка во СДСМ.

И Јакимовски, кој е повратник на градоначалничката функција во скопски Карпош, тврди дека во СДСМ никогаш досега, на ниту едно ниво во партијата не се разговарало за тоа кој би ја презел премиерската функција кога партијата ќе се врати на власт. „Ни на крај памет не ни е уште отсега да разговараме за кадровски прашања. Наша главна преокупација е како да си оди оваа власта. Јас сум градоначалник на Карпош и со граѓаните имаме заеднички проекти на чија реализација ќе работиме до крајот на мандатот“, потенцира Јакимовски.

Заев во два наврата се откажа од пратеничкиот мандат за да биде градоначалник на Струмица. Во 2005 година тој се повлече од пратеничкото место откако беше избран за градоначалник. На предвремените парламентарни избори во 2008 Заев беше носител на листата на СДСМ во Четвртата изборна единица, но, иако беше избран за пратеник, остана на градоначалничката функција. Потоа извесно време беше лидер на СДСМ, но и тогаш не се пресели во Скопје. Јакимовски, пак, првпат беше избран за градоначалник на Карпош на локалните избори во 2000 година, но кон средината на мандатот се повлече од функцијата за да стане министер за економија. Ги прескокна локалните избори во 2005, но минатата година повторно се кандидираше за градоначалник.

Прашањето дали Црвенковски ќе се обиде да се врати на премиерската функција е дежурна тема откако тој се врати на кормилото на СДСМ. Дилемите делумно ги подгрева и самиот Црвенковски, кој на сите прашања дали на следните избори ќе биде кандидат за премиер одговара дека одлуката за тоа ќе ја донесат органите на партијата. Иако шансите за предвремени избори се се' помали, а анкетите покажуваат дека СДСМ и натаму е зад ВМРО-ДПМНЕ, во јавноста се споменуваат многу имиња од СДСМ како потенцијални кандидати за премиер и се вртат разни опции за тоа во која насока би се движела неговата политичка кариера. (А.М.М.)