Поглед

Татковци на трудничко

Маја Томиќ

И татковците ќе одат на породилно отсуство. Па, кога можат татковците од Запад, зошто не и нашите млади Македонци. Владата е решена да го менува Законот за работни односи и веќе од наредната година да го примени ова во практика. Така било во многу земји во Европа, така би требало да биде и тука. Уште годинава било планирано да се менува Законот, но буџетскиот есап го спречил тоа. Од в година ќе се обезбеделе пари и Фондот за здравство ќе можел да го исплатува породилното на татковците.

Ај да видиме колку „јунаци“ ќе се јават, односно каков одѕив ќе има кај татковците оваа новина. Колкумина ќе пројават интерес да жртвуваат два месеца од својата работа и од дотогашниот начин на живеење, за да останат дома, со своето бебе и со жената.

Тоа, секако, подразбира дека треба да и' помагаат на мајката околу грижата за бебето, но и околу домаќинските работи. Притоа, на оние (за жал, помалобројните) што го правеле тоа и досега, овие законски новини не им значат ништо посебно. Веројатно поголема возбуда тие ќе предизвикаат кај другиот дел од машката популација кои, за да не одат на работа, би ја (зло)употребиле оваа законска шанса за некои други цели, како за шетање, на пример. Но, поаѓајќи од македонскиот менталитет, ова сигурно би биле екстремни примери.

Замислата на Владата е добра и да се надеваме дека многу млади татковци со воодушевување ќе ја прифатат. Времињата се сменети, сега важат други генерациски правила. И со сегашните законски правила, мажите можат да одат на породилно. Од потесниот и од поширокиот круг пријатели и роднини, ретко кој од нас може да каже дека слушнал за ваков пример. Да видиме дали од следната година работите ќе станат поинакви.