Кој упаѓа во хангарот на паднатиот хеликоптер

Од Министерството за одбрана и од МВР негираат, но истражен судија бил повикан на увид

Љубиша Станковиќ

Обидот за влез во хангарот каде што се сместени остатоците од паднатиот хеликоптер на АРМ ги вознемири надлежните. Истражен судија и јавен обвинител вчераутро биле повикани на увид откако бил забележан обид за насилно отворање на вратата од магацинот каде што се наоѓаат деловите на „МИ-17“. Станува збор за хеликоптерот, кој пред речиси три години се урна во неразјаснети околности, кај катлановско Блаце, при враќање од мисијата во Босна.

Како што дознаваме од извори од истрагата, обидот за влез во магацинот, сепак, завршил неуспешно. „Пломбата со која е затворен хангарот стоеше на место, а и вратата се' уште беше затворена, но, очигледно е дека некој се обидел да ја отвори“, велат извори од истрагата за „Утрински весник“, кои најавуваат дека дополнително ќе се прави вештачење околу целиот настан.

Иако за случајот пристигнала пријавата од страна на армијата, а Крим-техника била повикана на увид, официјално ниту од Министерството за одбрана ниту од МВР не го потврдуваат настанот.

„Не е точно. Станува збор за тешка шпекулација. Нема провалување во ниту еден арамиски магацин, а најмалку во овој каде што се чува армискиот хелокптер“, ни изјави вчера портпаролот на Генералштабот на АРМ, полковник Мирче Ѓорговски, негирајќи дека некој насилно влегол во хангарот што се наоѓа на воениот аеродром. Според Ѓорговски, за настанот се интересирале повеќемина новинари, но тој е дециден дека немало никакво упад во магацинските простории.

За настанот вчера немаше потврда ниту од страна на МВР. Оттаму велат дека нема пријава за грабеж во армиски магацин, односно таков настан воопшто не е регистиран во полициските билтени.

Но, од Кривичниот суд во Скопје тврдат сосема поинаку. Извори во судот потврдуваат дека по јавување од АРМ, истражен судија вчераутро бил повикан и извршил увид на местото каде се случил настанот. На увидот присуствувал токму истражниот судија што ја води истрагата за хелокоптерската несреќа.

Армискиот транспортно-борбен хеликоптер речиси три години е во фокусот на интересот на јавноста, по кобното загинување на 11 мировници, кои се враќаат во земјава по мисијата во Босна.

За трагедијата што се случи на 12 јануари 2007 година, експертски тимови изготвија неколку извештаи, а по точно две години од настанот, односно во јануари минатата година Владата го објави извештајот за падот на воениот хеликоптер. Како причина за падот беа посочени сложените метеоролошки услови за летање, поточно облачното време проследено со густа магла, непочитување на процедури, техничка неисправност на неколку инструменти и уште неколку други забелешки. И покрај неколкуте извештаи, јавниот обвинител Љупчо Шврговски побара нова, независна експертиза. За таа цел, беше ангажиран британскиот експерт за воени несреќи, Едвард Пули. Тој во мај годинава направи увид на местото на несреќата, а го посети и магацинот во кој се сместени деловите од хеликоптерот. Извештајот на Пули требаше да биде готов до септември годинава, но експертизата е пролонгирана по негово барање поради прибирање дополнителни докази.