Уште една година ништо нема да се знае за „Јужен поток“

Русија би го затворила со тоа клириншкиот долг од 60 милиони долари, а колку ќе не' чини целиот проект се' уште не се знае

Маја Томиќ

Македонија изрази желба да стане дел од гасоводот „Јужен поток“. На вчерашната средба владините претставници и гостите од рускиот „Гаспром“ се договарале и ги разгледувале опциите како тоа да се направи во практика. Според министерот за финансии, Зоран Ставрески, земјава е на чекор поблиску до реализацијата на проектот за гасификација и станува се' поизвесно дека ќе бидеме дел од „Јужен поток“.

„Постојат размислувања за тоа дали самостојно да се приклучиме како крак или, пак, низ земјава ќе има транзитна линија, во зависност од тоа дали соседна Албанија и Косово ќе изразат подготвеност за учество во проектот. Колку тој ќе не' чини, ќе се знае кога ќе бидат завршени техничките анализи“, изјави Ставрески по средбата. Тој додаде дека сега прво треба да се завршат техничките анализи за исплатливоста на гасоводот, за тоа каде и како ќе се приклучиме, а потоа ќе се оди на потпишување меѓудржавен договор со Русија и создавање заедничка фирма. Владата веќе формирала претпријатие „Македонија гас“, кое во иднина ќе работи и ќе му биде партнер на „Гаспром“ во реализацијата на проектот.

„Со доаѓањето на ’Гаспром‘ во М��кедонија земјава ќе биде поатрактивна за странските инвеститори, затоа што ќе има стабилност во снабдувањето со еколошкиот и евтиниот енергенс, а тоа воедно ќе значи и развој на економијата“, рече Ставрески.

Началникот на одделот за управување со проекти на „Гаспром“, Леонид Чугунов, истакна дека е неопходен период од најмалку една година за техничките подготовки, по што ќе се знае дали и во каков вид ќе поминува гасоводот низ Македонија. Тој истакна дека предност е што Македонија веќе има изработено проект за гасификација и ќе се оценува во колкава мерка тој ќе биде искористен.

Според владини процени, потребите на Македонија за гас ќе растат во наредните години поради порастот на странските инвестиции и дека до 2040 година ќе ни требаат меѓу 2,5 и три милијарди кубни метри гас годишно, а во моментов се трошат околу 800 милиони кубни метри.

Изградбата на гасоводот „Јужен поток“ беше најавена уште во јуни 2007 година, кога италијанската „Ени“ и „Гаспром“ потпишаа меморандум за разбирање. Според постојната верзија на проектот, цевките за гас треба да ја заобиколат Македонија. А, гасот од Русија треба да стигнува во Бугарија, Италија, Србија, Унгарија, Хрватска, Словенија и Австрија. Јужниот крак е дефинирано да минува низ Грција, а преку северниот крак во Србија, на гасоводот да се приклучат и повеќе земји од Централна Европа. Проектот треба да се реализира во 2015 година, а вкупната инвестиција се проценува на 8,6 милијарди евра. Капацитетот е проектиран на 60 милијарди кубни метри гас годишно.