Глигор Чемерски

Танц со ќерката – нескриена радост за своите изложби

Нарекувајќи го сликарот Глигор Чемерски еден од неколкутемина корифеи на ликовната уметност во Република Македонија, министерката за култура, Елизабета Канчевска-Милеска, стоејќи пред репродукцијата на неговиот мозаик „Македонија - светла земја“, завчеравечер во Даут-пашин амам, преполн со слики и со гости, ја отвори ретроспективната изложба со која авторот одбележува 50 години творештво.

Во овој изложбен простор на Националната галерија, публиката освен двете репродукции на мозаиците поставени во Кабинетот на претседателот на Македонија, имаше можност да ги види и раните дела на Гиче (како што го нарекуваат пријателите), а по два часа обиколка на изложеното и меѓусебно муабетење, се префрли во галеријата Чифте-амам за да се сретне и со останатиот дел од вкупно презентираните 270 дела.

Пријатната и очекувано впечатлива атмосфера ноќта во амамите ја создаваа не само сликите на Чемерски туку и музиката на Влатко Стефановски и настапот на џез-квартетот на Ристо Ивановски, а изненадување беше и танцот на сликарот со неговата ќерка Елена. Гиче цела вечер беше опкружен и со своите пријатели, меѓу кои имаше и академици, уметници, политичари, новинари, љубопитни да ја видат најновата концепција на презентација на негов��то богато творештво што датира од шеесеттите години на минатиот век.

А поврзувањето на двете галерии во Старата скопска чаршија во една вечер со дела на едно значајно ликовно име, беше навистина голем погодок на Националната галерија, и еден вид увертира во вечерашната „Бела ноќ“, во која публиката, исто така, одејќи пеш, ќе може да посети неколку места во центарот на градот каде што ќе се одржуваат планираните културни настани. (К.Б.)