Конечно, стигна првиот украински автобус

Доколку нема никакви проблеми, првата тура од 15 автобуси би требало да стаса најдоцна за еден месец

Деспина Трајковска


По еднонеделен транспорт, вчера, конечно, пристигна првиот автобус од Украина. Фирмата „Лаз“, која за потребите на јавниот превоз во главниот град треба да произведе вкупно 84 автобуси, го испорача примерокот од единечните автобуси што ги произведува за Скопје. Сепак, граѓаните ќе немаат можност веднаш да го видат новото возило по улиците, бидејќи тоа ќе треба да ги помине задолжителните технички проверки. Автобусот вчера речиси цел ден мина на царинскиот терминал, по што требаше да биде транспортиран до Машинскиот факултет за да биде подложен на неопходните испитувања.

Никој од надлежните вчера не сакаше да прогнозира колку ќе траат тестирањата и дали и кога може да се очекува крајниот епилог, одобрување на возилото. Возбудени оти конечно стаса првиот автобус беа и во ЈСП и во Бирото за метрологија кои практично ќе го дадат пресудниот збор.

„Веројатно уште денеска комисија од Машински факултет ќе почне со техничките испитувања на производот да се утврди дали тој соодветствува на приложената документација. По завршените испитувања, комисијата треба да достави до нас извештај и ��околку е позитивен, имаме обврска во најкус можен рок да издадеме т.н. типско одобрение. Тоа автоматски ќе значи дозвола за почнување на постапка за регистрација на возилото и виза за испорака на преостанатите 14 возила“, изјави вчера Димитар Парнарџиев од Бирото за метрологија.

Ниту тој ниту, пак, директорот на ЈСП, Мишо Николов, вчера не сакаа да го прогнозираат исходот, но искрено се убедени дека нема да се појават неочекувани пропусти кај возилото. Најоптимистички сметано, доколку нема никакви проблеми, првата тура од 15 автобуси би требало да стаса најдоцна за еден месец. Тоа, практично, ќе значи доцнење од триесетина дена од договорениот термин за испорака, утврден со владината набавка тешка 11 милиони евра. Украинците имаа обврска првите автобуси да ги испорачаат најдоцна до крајот на годинава, што е јасно дека е неизводливо. Надлежните потенцираат дека според договорот, украинскиот производител за секој ден доцнење од предвидената динамика на испорака ќе има обврска да плати пенали во висина од 0,1 процент од вредноста на автобусите.

Инаку, останатите 69 автобуси е планирано да се испорачаат до крајот на 2011 година. Четири автобуси ќе бидат дупли, а другите единечни. Сите се црвени, со покрив во драп, бои препознатливи за возниот парк на ЈСП.