Се испазарија за тутунот, сега чекаат на ветеното

Штрајкувачкиот одбор денеска одлучува дали повторно ќе ги активира протестот и блокадите на патиштата

Сања Наумовска
Моника Талеска

Тутунарите и откупувачите со часови се ценкаа во Владата и постигнаа договор за повисоки откупни цени и за отворање на сите откупни центри. Производителите добија ветување дека до завршувањето на откупот ќе се постигне просечна цена од 170 денари за килограм тутун. Парите за предадениот тутун ќе им бидат исплаќани на производителите во рок од 20 дена. Меѓутоа од Прилеп стигнуваат информации дека тутунарите не се задоволни од текот на откупот. Во Тутунскиот Комбинат и на пунктовите на Алијанса и Центро-табак до некаде се почитувал договорот со тутунарите. Но тоа не било случај во Сокомак каде што се вршел откуп по ригорозни критериуми, а Струмица-табак не ги отвори откупните пунктови.

„Соко-мак врши откуп по ригорозни критериуми, а Струмица-табак не ги отвори откупните пунктови. Тоа што го гледаме на терен не е ни приближно како што се залагаме“, велат тутунарите.

И од Сојузот на тутунски здруженија потврдуваат дека тутунарите не се задоволни од текот на откупот.

„Тутунарите го враќаат тутунот. Се' уште нема ништо на терен. Освен преку Инспекторатот, ќе се бориме за регуларен откуп по реални цени и преку претставниците на Сојузот на тутунски здруженија кои се присутни на сите откупни ваги“, рече Данчо Милески, претседател на Сојузот.

Од Штрајкувачкиот одбор на пелагониските тутунари се категорични и натаму во нивните барања.

„Нема да дозволиме откупувачите да се поигруваат со нас. Не отстапуваме од барањата. Денеска ќе одлучиме дали повторно ќе го активираме протестот и блокадите на патиштата“, велат од Штрајкувачкиот одбор.

Единствено задоволни вчера беа кооперантите на Тутунскиот Комбинат, каде според нивни оценки три дена се врши откуп со реална процена на реколтата, која е со одличен квалитет или за 40 отсто подобар во однос на минатогодишната.

„Носам дел од реколтата, задоволен од процената. Не знам колкава ќе биде просечната откупна цена, зашто цел тутун не ми е предаден“, истакна Миле Стојкоски кој го затекнавме при предавање на родот во Комбинатот.

На откупните ваги процената на родот ја следеше и министерот за земјоделство, Љупчо Димовски кој најави мерки против откупните фирми кои што немаат да ги почитуваат договорот со тутунарите постигнат во Скопје.

„Ќе се разговара на подруг начин во заштита на интересите на тутунарите. Не инсистирајте кој е тој подруг начин. Ние сакаме да се почитува законот, да се изврши целиот откуп во законската форма, но истовремено тој откуп да не биде на штета на тутунарите“, изјави Димовски вчера во Прилеп.

Инаку, по дводневно блокирање на регионалниот пат Прилеп-Градско, тутунарите ги ставија протестите во мирување и чекаат да се исполнат ветувањата. Претставници на тутунарите и на откупувачите на тутун, во понеделникот доцна вечерта во Владата разговараа со вицепремиерот за економски прашања, Владимир Пешевски и со министерот за земјоделство, Љупчо Димовски. Падна договор за строго почитување на класите тутун согласно правилникот и дефинираните цени од откупувачите. Откупувачите, пак, преземале обврска да ги откупат сите количини на тутунот што ќе им бидат донесени на пунктовите.

„Шесте барања се исполнети во целост. За седмото барање, да се постигне просечната цена за килограм тутун приближна на ланската добивме ветување од Владата дека ќе стои зад нас. Сакаме да видиме на терен дали тоа ќе се исполни. Затоа дадовме рок од 48 саати. Доколку тоа се постигне, откупот ќе продолжи. Во спротивно ќе преземеме други санкции и ќе ја бараме причината зошто не се испочитува договореното“, вели Менде Стонаровски, произведувач на тутун од Кривогаштани.

Вицепремиерот Пешевски рече дека функционирале половина од откупните места и очекува сите да бидат отворени. Тој ги повика производителите да го предаваат и најквалитетниот тутун, бидејќи ќе ја добијат минималната цена според правилникот, која нема да биде иста како лани, но сепак, ќе биде една од највисоките.

Министрите ги информирале тутунарите дека на терен, додека трае откупот постојано ќе биде Земјоделскиот инспекторат, кој ќе ја следи состојбата. Инспекторатот ќе отвори и телефонска линија на која ќе може да се пријават неправилности. Така инспекторите можат да извршат увид на откупното место.

„Доколку се испочитува договореното, очекуваме дека просечната откупна цена што ќе се постигне на крајот на процесот ќе биде најмалку 170 денари, иако во одредени случаи таа ќе биде и повисока имајќи предвид дека оваа сезона квалитетот на тутунот е подобар од лани. Во спротивно, ќе следат санкции согласно законот“, истакна Пешевски.