„Пајажината“ плете, А1 не и' се дава на власта

Премиерот Груевски разговарал со Јанкулоска околу „спектакуларниот начин на апсење“

Инспекторите на Министерството за внатрешни работи, Управата за јавни приходи и Финансиската полиција продолжуваат да работат на расчистување на криминалот околу фирмите на „Перо Наков“. Освен што се трага по синот на сопственикот на А1 телевизија, Хеди Рамковски (36), кој е во бегство веќе неколку дена, службите и натаму ги чешлаат документите и компјутерите запленети од фирмите што надлежните ги поврзаа со Велија Рамковски. Според најавите, не е исклучена можноста истрагата да се прошири и на други, покрај 23 што се веќе осомничени за разни кривични дела.

Во јавноста, пак, не стивнуваат реакциите за начинот на кој беше изведена минатонеделната акција „Пајажина“, во која постојат индиции за криминал тежок над 17 милиони евра.

Премиерот Никола Груевски, при завчерашното гостување во емисијата „Х/О“ на телевизијата Канал 5, објасни дека акцијата била преземена откако „УЈП верувале дека ќе се надминат пречките да извршат контрола во фирмите, но очигледно не се случило тоа“. На прашањето зошто се „спроведе спектакуларен начин на апсење“, премиерот рече дека на таа тема повеќепати разговарал со министерката Гордана Јанкулоска.

„Добив одговор од министерката дека нашата полиција е тренирана според стандардите на ЕУ. На ист начин се носат пред истражен судија и во Германија, Англија... Се согласувам дека сме мала средина, дека малку е понепријатно, можеби во иднина ќе се најде начин да го избегнат визуелниот дел... Да ги внесуваат преку друг влез. Тоа е предизвик за кој МВР треба да размисли“, изјави премиерот.

Вчера се огласи и Амбасадата на САД во Скопје, според која „сите законски постапки поврзани со истрагата што е во тек треба да се спроведат со целосна транспарентност и во отворен и праведен процес, без политички притисок или пристрасност“.

Амбасадата изразува загриженост од извештаите дека „финансиски спонзори на А1 или други организации се под политички притисок за да го намалат или зголемат рекламирањето“ во телевизијата.

Во затворот „Скопје“ веќе петти ден трае притворот на 14 лица, меѓу кои Велија Рамковски, неговата постара ќерка, братот, поранешниот и сегашен директор на А1. Нивните адвокати, но и Обвинителството се подготвуваат за натамошниот тек од постапката.

За тоа време, продолжуваат да се шират шпекулациите околу иднината на телевизијата. Сопругата на Рамковски, Мазес, во интервју за А1, рече дека телевизијата нема да потклекне.

„Тие мислат дека ќе ја земат А1. Нека ја земат зградата, А1 може да постои и некаде на друго место. Секогаш ќе постои“, изјави Рамковска.

Во јавноста веќе проструија информации дека семејството Цаноски, кое е во сватовски релации со Рамковски, ќе го презеде менторството со телевизијата и ќе им ги исплати платите што им се должат на вработените. Но, зетот на Рамковски, Сефер Цаноски, во вчерашната изјава за „Утрински“ негираше нивен влез во телевизијата. (Г.А.)