Сите подадени рачиња заслужуваат прегратка

Со љубов за децата. Комерцијална банка им го разубави секојдневјето на дечињата од Центарот за дневен престој на деца од улица во Шуто Оризари

Децата не бараат многу. Понекогаш е доволна само една подадена рака, насмевка, искрена прегратка. Тоа е се' што сакаат од возрасните. Некој да се сети, да помисли на нив, барем на момент.

Комерцијална банка, една од најуспешните македонски банки, во изминатата недела тропна на вратата на Центарот за дневен престој на деца од улица, сместен во Шуто Оризари, во детската градинка „Снежана“. Таму на дневна база се сместени деца буквално собрани од улица, на возраст од 4 до 16 години, таму се бањаат, едуцираат, социјализираат... Откако постои, од 2006 година, низ него минале 145 деца, а моментно престојуваат 80 деца, од кои 60 се вклучени во образовниот процес. Постојано имаат недостиг од средства и од најосновни животни продукти (млеко, хигиенски производи...), а опстануваат по пат на донации и поддршка од Министерството за труд и социјала, но само за период од шест месеци. Останатото е преживување.

Имајќи го предвид сето ова, а со цел да им ги разубави предновогодишните денови и да измами насмевки на детските лица, Комерцијална банка во изминатава недела го посети Центарот за деца од улица во Шутка, им донесе подароци (прехранбени продукти, средства за хигиена, облека, обувки и играчки, собрани од вработените, боенки, боички...), им приреди појадок, ги расположи со музика (имаше и гитарст)... Покрај донацијата, членовите на координативното тело на банката неколку часа активно се дружеа со дечињата, цртаа и боеја заедно и преку разговор ја задоволуваа нивната љубопитност.

„Сакавме да им го разубавиме денот на тие деца. Наидовме на весела атмосфера, беа малку еуфорични, знаеја дека ќе дојдеме, но да не беше Нова година и да не беше украсена просторијата, сликата ќе беше многу жална. Тоа се деца кои на некој начин се заборавени, а девојките што работат таму вложуваат голем напор, обидувајќи се да ги стават во нормален ред. Да не се таму, би биле на улица, изгладнети, необлечени...“, ни пренесе дел од впечатоците Маја Стевкова-Штериева, главна финансиска директорка во Комерцијална банка. „Тие деца имаат потреба од топлина, од допир и нежност. Штом ве видат, веднаш трчаат и ве гушкаат. Сакаат да се галат и ако оставите едно детенце за да му обрнете внимание на друго, тоа доаѓа по вас и повторно ве гушка. Гушкањето беше и најголемиот впечаток“.

Членовите на координативното тело за општествена одговорност на Комерцијална банка цртаа и боеја заедно со децата, учеа математика, пееја, а на подарок добија специјални новогодишни честитки со лична посвета. Толку се зближија со гостите што не сакаа да ги пуштат да си заминат. Им приредија и мала приредба, им ја испеаја „Македонско девојче“...

„Тие деца се задоволуваат со малку. Се радуваат на боички, на ситни играчки и сакаат нежност и внимание. Многу е полесно да дадеш донација и да се држиш настрана, потешко е да одиш и да воспоставиш контакт, а уште потешко е со зборови да ја доловиш таа нивна потреба од нежност и прегратка“, вели Стевкова-Штериева, која најави дека Комерцијална банка и понатаму ќе продолжи со вакви и слични хуманитарни акции.

На крајот, сите подадени детски рачиња заслужуваат прегратка. (К.Ш.)