Дорис Пак и претседателот Иванов се смирија

Европарламентарката Дорис Пак и претседателот Ѓорге Иванов вчера ги измазниле разликите, откако еден ден претходно таа му се закани на македонскиот лидер дека ќе го даде на суд доколку не ја повлече изјавата оти Македонија во 2005 година одбила евроинтеграција во НАТО и во ЕУ под референцата и дека тоа му го соопштила токму таа.

Вчера Пак се сети дека, сепак, се сретнала со претседателот Иванов на комеморацијата за Сребреница во јули, но настанот не дозволувал да расправаат за спорот за името. Пак нема да бара ниту јавно извинување, откако претседателот ја уверил дека новинарите ја искривиле целата приказна.

Од Кабинетот на Иванов вчера не сакаа дополнително да коментираат посочувајќи на реакцијата упатена до медиумите претходниот ден, во која беше наведено дека на контроверзниот брифинг со новинарите во Охрид претседателот, со намера „да поттикне истражувачко новинарство околу евроинтеграцијата на земјата“, ги охрабрил новинарите да бараат интервјуа од клучни актери на домашната и на меѓународната сцена, меѓу кои и од Дорис Пак, за да имаат комплетна слика на случувањата околу овој процес. Признавајќи дека средбата со Пак била куса, од Кабинетот додаваат дека таа активно се залага за остварување на оваа стратегиска определба на Македонија и оти новинарите треба да бидат коректни во известувањата за да не предизвикуваат вакви недоразбирања. Инаку во посочениот период кога Македонија, наводно, одбила понуда за евроинтеграција претседател беше Бранко Црвенковски, а премиер Владо Бучковски. (Н.Р.)