Поглед

Специјална класа

Нина Нинеска-Фиданоска

И тоа го доживеавме. Во Македонија невработеноста била толку многу висока што европските статистичари за нас ќе формирале посебна категорија, во која би можеле да не' сместат според овој критериум. Педантните Европејци мереле, сечеле, но на крај само во немоќ констатирале дека Македонија мора да се тр��тира како приказна сама за себе кога се набљудува низ призмата на овој проблем.

Луѓето од Евростат, колку и да не сакале, морале да забележат дека во нашата држава стапката на невработеност не е само малку повисока отколку на другите места во Европа, туку многу, многу подраматична. Тоа е факт дури и кога Македонија се споредува со земјите што се сметаат за своевидни рекордери на тој план. Како такви се посочуваат Шпанија и Латвија, каде што процентот на „несреќници“ што бараат работа достигнал до 20 отсто, или една петтина од нивната популација. Но, што е оваа стапка за нашата успешна реформска и преродбеничка приказна? Ма, ве молам, па 20 проценти за нас се мачкина кашлица. Ние веќе сме дошле до 33,6 проценти, толку многу наши граѓани секој ден безнадежно чекаат да им се јави некој од Агенцијата за вработување и да им каже дека им нашол каква било работа. Ама работа во Македонија едноставно нема.

Веројатно службениците од Евростат не можеле доволно да се изначудат кога ги правеле своите анализи, прашувајќи се која ли е таа „лузерска“ држава на европска територија, што си дозволила дури една тр��тина од нејзините жители да немаат работа и да живеат на туѓ грб. И за трагедијата да биде уште поголема, европските статистичари немаат ни трошка оптимизам дека работите ќе тргнат на подобро, односно дека Македонија би можела да го искористи светското економско закрепнување за да ја подобри состојбата со вработеноста. Засега, драги мои, толку од преродбата.