Владиниот прием за Рамковниот без државниот врв
Во преполната сала, во која буквално не се дишеше бидејќи не функционираше климатизацијата, доминараа членови и симпатизери на ДУИ
Државни функционери имаше многу малку на приемот што го организираше Владата, Ахмети презадоволен
Целиот државен врв завчера вечерта отсуствуваше од коктелот во хотелот „Холидеј ин“ во Скопје што се одржа под повод седумгодишнината од потпишувањето на Рамковниот документ, а под покровителство на Владата. Ахмети, кој во салата ги пречекуваше гостите, не го криеше задоволството што годинава се случи пресврт, па наместо ДУИ, прославата ја организираше владиниот Секретаријат за спроведување на Рамковниот документ. Тоа што свеченоста ја игнорираа највисоките државни функционери - претседателот Бранко Црвенковски, претседателот на Собранието Трајко Велјановски и премиерот Никола Груевски, не ја помати славеничката атмосфера.
Во преполната сала (во која буквално не се дишеше бидејќи не функционираше климатизацијата) доминараа членови и симпатизери на ДУИ. Од Владата беше присутен само министерот за финансии Трајко Славески, а од Кабинетот на шефот на државата чест направи Зоран Иванов, советник за односи со јавноста. Владејачката ВМРО-ДПМНЕ беше претставена со неколкумина неекспонирани пратеници и со градоначалниците на Гази Баба и на Бутел, Коце Трајановски и Петре Латиновски. И СДСМ имаше скромно присуство на приемот, таму беа само пратеничката Славица Грковска - Лошкова и организацискиот секретар Александар Чаботарев. На прославата дојдоа неколкумина претставници на дипломатскиот кор во земјата.
„Многу голем и важен чекор е што за првпат одбележувањето на Охридскиот договор го организира Владата“, изјави Ахмети за новинарите зборувајќи на македонски јазик, кој не сакаше да го коментира отсуството на премиерот Груевски. „Најголема придобивка од Рамковниот договор е тоа што сите граѓани ја чувствуваат Македонија како своја држава и сите се лојални. Ова е голема победа и за Македонците, кога Албанците се лојални на државата“, рече Ахмети. Тој додаде дека е добро што СДСМ се вратила во Собранието и изрази надеж дека истото ќе го стори и ДПА по завршувањето на одморите.
Вицепремиерот за спроведување на Охридскиот договор, Абдулаким Адеми, на присутните им ја честиташе седумгодишнината од потпишувањето на Документот.„Охридскиот договор е заедничка вредност за сите граѓани на Македонија и служи како мост што ги обединува сите етнички заедници и ја засилува довербата на граѓаните во институциите на државата. Ова е една успешна сторија за земјава и модел за решавање на меѓуетничките конфликти“, рече Адеми. (О.В.) |
